DiliPost.com – Primeiru-Ministru (PM), Kay Rala Xanana Gusmão, partisipa iha reuniaun interministeriál koordenasaun bá da-haat kona-bá ASEAN no reuniaun ACNOC bá da-toluk, iha Ministériu Negósiu Estranjeiru no Kooperasaun (MNEK).
Reuniaun ne’e realiza atu asegura preparasaun no koordenasaun entre ministériu no instituisaun relevante sira hodi hasa’e prontidaun Timor-Leste bá partisipa iha enkontru importante sira ASEAN no mekanizmu sira ne’ebé liga ho organizasaun rejionál ne’e.
Primeiru-Ministru enfatiza importánsia servisu hamutuk entre entidade governamentál sira atu garante Timor-Leste bele partisipa ho preparasaun di’ak, hodi reprezenta interese nasionál no kontribui ativamente iha prosesu integrasaun rejionál.
“Ami ko’alia de’it kona-bá progresu preparasaun tanba Timor-Leste sei asume Prezidénsia ASEAN iha 2029. Ministru Negósiu Estranjeiru no Vise-Ministra Asuntu ASEAN hato’o katak preparasaun barak ona la’o di’ak no estabelese ona prazu atu kompleta to’o fulan Dezembru. Ami mós ko’alia kona-bá aprezentasaun planu ida atu responde bá atividade sira ne’ebé sei hala’o to’o 2029,” hateten Primeiru-Ministru Xanana Gusmão Praia dos Coqueiros, Díli, Kinta feira (16/07).
Reuniaun preparasaun sira ne’e sei lidera hosi Vise-Ministra Asuntu ASEAN, Milena Rangel, hodi asegura Timor-Leste prepara-an ho di’ak atu bele asume Prezidénsia ASEAN iha 2029.
PM Xanana bolu atensaun bá ministériu hotu-hotu atu kontinua halo koordenasaun ho nasaun membru ASEAN sira, liuliu iha implementasaun akordu no kooperasaun iha área ida-idak, atu integra saun Timor-Leste iha ASEAN bele fó benefísiu bá nasaun.
Reuniaun ne’e mós avalia progresu preparasaun iha área oioin, inklui aspetu tékniku, koordenasaun polítika no lojístika, atu asegura Timor-Leste prontu bá kumpri kompromisu no atividade sira iha kuadru ASEAN.
Governu kontinua demonstra nia kompromisu atu hametin preparasaun nasionál no reforsa koordenasaun interministeriál hodi apoia prosesu integrasaun Timor-Leste bá ASEAN no aumenta benefísiu bá povu no dezenvolvimentu nasaun.(Aza)
