DiliPost.com-Diretur Diresaun Tranzitu Seguransa Rodaviariu (DTSR), Superintendente Asistente Polísia, Luis da Costa hateten, Polísia Nasionál Timor-Leste (PNTL), liu husi Polísia Tranzitu Seguransa Rodaviariu se’i bolu inan-aman uainhira nia oan la iha Karta Kondusaun maibe, utiliza motor tanba inan-aman ninia kontribuisaun bo’ot ba oan sira maibe, la haruka atu oan sira tenke iha Karta Kondusaun.
Durante,”ami hare’e kontribuisaun husi inan-aman bo’ot liu ba nia oan sira tanba hola motor fo ba nia oan maibe, la haruka oan sira ba halo ‘Surat Izin Mengemudi (SIM),’ Karta Kondusaun tanba inan-aman sosa motor ho folin karun maibe, atu hasa’i Karta Kondusaun ho folin $ 20.00, la bele inan-aman la bele esforsu oan la hetan Karta Kondusaun,”informa DTSR-Luis ba Jornalista iha Kuartel Jerál PNTL Caicoli-Dili, Tersa-feira (01/04/).
Deklarasaun
Luis dehan, tanba iha Lei Kodigu Estrada hatetn, ema ne’ebé idade-16 inan-aman bele halo deklarasaun atu nia oan bele halo Karta Kondusaun tanba obrigatoriu tenke hetan Karta Kondusaun hafoin konduz motor.
Maibe, realidade Estudante sira barak la iha Karta Kondusaun maibe, konduz motor. Tanba,”ami PNTL liu husi Polísia Tranzitu Seguransa Rodaviariu afirma iha tempu badak se’i halo operasaun ba Eskola hotu iha Kapital Dili,”Luis hateten.
Motorizada
Luis promete, Polísia Tranzitu tempu badak se’i tama sa’i Eskola hodi hare’e Estudante hirak ne’ebé uza motorizada maibe, iha Karta Kondusaun la iha Polísia Tranzitu iha obrigatoriu foti hotu motor iha Eskola.
Tanba,”ami Tranzitu Seguransa Rodaviaria aviza ba Estudante sira hotu atu bele bo’ok an halo Karta Kondusaun, se la’e ami se’i tama Eskola Pre-Sekundaria to’o Sekundariu iha Kapital Dili se’i tama sa’i hodi hala’o pasarevista,”nia subliña.
Paniku
PNTL husu ba Profissores atu koopera ho Polísia Tranzitu nia prezensa iha Eskola sira, karik lalika paniku tanba Polisia Tranzitu (PolTranz), hakarak hala’o prevensaun. Tanba, asidente iha Kapital Dili kuaze labarik minoridade sira no la iha Karta Kondusaun maibe, konduz motor no tula malun nain 2-3 la uza Kapasete.
Prende
“Ami se’i halo pasarevista ba Eskola oan hirak ne’ebé utiliza motor maybe, la iha Karta Kondusaun se’i prende hotu lori mai iha Polísia Tranzitu. Tan ne’e, husu inan-aman atu haka’as oan sira atu hetan Karta Kondusaun molok utiliza motor ba Eskola,”nia informa.
Hadomi
Inan-aman ninia kontribuisaun bo’ot ba oan sira tanba hadomi nia oan sosa motor ba oan sira maibe, la iha esforsu atu haruka oan ba trata Karta Kondusaun. Tanba, inan-aman hatene sosa ba nia oan sira.
Prepara mos kaixaun ba nia oan sira tanba hadomi oan sira tenke hadomi mos nia vida keta hadomi nia oan maibe, la hadomi nia oan nia vida. Tanba, sosa motor fo ba oan tenke hateten, ba oan atu hala’i neneik no ba trata Karta Kondusaun molok lori motor.(ercia)
