DILI Post, 06 Dezembru 2025 — Ministru Negósius Estranjeirus no Kooperasaun, Bendito dos Santos Freitas iha tuku 9:30 kalan otl partisipa iha XVII Enkontru Estraordináriu Konsellu Ministru Comunidade dos Países de Língua Portuguesa (CPLP) ho forma virtual ne’ebé prezide husi Ministra Estadu no Negósius Estranjeirus, Kooperasaun no Komunidade Repúblika Demokrátika São Tomé e Príncipe, Ilza Amado Vaz.
Sromutu ne’e atu halo análize ho preokupasaun kle’an situasaun polítika no institusionál iha Guiné-Bissau, hafoin golpe Estadu ne’ebé akontese iha loron 26 fulan-novembru tinan 2025.
Iha enkontru ne’e, Ministru Negósius Estranjeirus CPLP nian kondena Kondena maka’as interrupsaun ba prosesu eleitorál ne’ebé akontese iha Guiné Bissau hodi konsidera katak, ida ne’e konstitui violasaun grave ida ba prinsípiu demokrátiku no vontade soberanu povu guiniense nian;
Rejeita ruptura institusionál ne’ebé akontese ona iha Guiné-Bissau, ne’ebé kompromete estabilidade polítika no orden konstitusionál; Ezije libertasaun imediata no inkondisionál ba ema hotu-hotu ne’ebé detidu iha ámbitu krize polítika atuál; Defende restaurasaun urjente orden konstitusionál nu’udar kondisaun indispensável ba pás, estabilidade no dezenvolvimentu iha rai-laran.
Alénde ne’e, deside atu estabelese Misaun Eskritóriu Di’ak sira ho Nivel Aas atu haruka ba Guiné-Bissau lalais liután. Rekomenda suspensaun temporáriu Guiné-Bissau nian, ne’ebé sei desidi iha Konferénsia Xefe Estadu no Governu CPLP nian, no transferénsia prezidénsia pro tempore organizasaun nian ba Estadu-membru seluk.
Konsellu Ministrus mós reafirma kompromisu CPLP nian ba valores demokrasia, legalidade no solidariedade entre nia Estadu-membru sira no vontade atu apoia ho forma konsertada, esforsu hotu-hotu ne’ebé lori ba restaurasaun normalidade institusionál iha Guiné-Bissau;
Nune’e mós mantein kompromisu metin ba prinsípiu ba páz, governasaun demokrátiku, estadu direitu no legalidade konstitusionál ne’ebé konsagra iha Deklarasaun Konstitutiva no Estatutu sira Organizasaun nian ne’ebé Estadu-membru hotu-hotu asina no ninia solidariedade fraterna ho povu Guiné-Bissau.
Konsellu Ministru mós konkorda kona-ba nesesidade atu halais ratifikasaun ba Estatutu revizaun sira ne’ebé aprova ona iha Reuniaun Estraordinária Konsellu Ministru ba dala XVI, ne’ebé hala’o iha Luanda iha tinan 2023.
Entretantu Ministru Negósius Estranjeirus CPLP sira-ne’ebé partisipa iha reuniaun ne’e mak hanesan: Ministru Negósiu Estranjeiru Repúblika Angola, Téte António, Ministru Negósiu Estranjeiru Repúblika Federativa Brazil, Mauro Vieira, Ministru Negósiu Estranjeiru, Kooperasaun no Integrasaun Rejionál no Ministru Komunidade sira Repúblika Cabo Verde, José Luís Livramento, Ministru Negósiu Estranjeiru, Kooperasaun Internasionál no Diáspora Repúblika Guiné Ekuatoriál, Simeón Oyono Esono Angue, nian.
Ministra Negósiu Estranjeiru no Kooperasaun Repúblika Mosambike, Maria Manuela dos Santos Lucas, Ministru Estadu no Negósiu Estranjeiru Repúblika Portugál, Paulo Rangel, Ministru Negósiu Estranjeiru no Kooperasaun Repúblika Demokrátika Timor-Leste, Bendito dos Santos Freitas, inklui Sekretária Ezekutiva Komunidade País sira Lian Portugés, Maria de Fátima Jardim, no Reprezentante Permanente sira ba CPLP no funsionáriu sira hosi Sekretariadu Ezekutivu CPLP nian.
Jornalista : Azacsi Quintão
