Dilipost.com- Prosesu primeiru interogatoriu Tribunál Judisial Primeira Instansia Dili, iha Kinta-feira (16/07/2026) kalan, ‘deside’ hatun despaxu aplika medida Kauasaun ho montante dolar Marikanu rihun rua atus lima ($2,500) ba kada arguidu ne’ebe deskonfia komete kazu ‘online Scam Call Center’ iha área Kampung Baru.
Iha prosesu arguidu nain 14, hili direitu nonok, tan ne’e Tribunál liu husi Juiz aplika medida Kauasaun durante prazu loron 20 nia laran no medida koasaun Aprezentasaun Periodika semana ida dala rua ba aprezenta-an iha Postu Polísia ne’ebé besik.
Ho desizaun ne’e parte defeza husi arguidu sira ne’ebé substitui husi advogadu privadu, Januario Martins haktuir katak despaixu Tribunal nia ba arguidu nain-14 iha área Kampung Baru, Tribunál aplika medida Proibisaun Auzensia, medida koasaun Aprezentasaun Periodika no medida Kauasaun ho osan valor $2,500 ba kada arguidu.
“Medida Proibisaun Auzensia, medida koasaun Aprezentasaun Periodika semana ida dala ida Postu Polísia ne’ebé besik no medida Kauasaun $2,500 ba kada ema ida”, informa nia ba Jornalista iha Tribunal Judisial Primeira Instansia Dili, Kinta ne’e.
Antes ne’e, alegasaun Ministériu Públiku (MP) reprezenta Prokurador, João Marquez, husu Tribunál aplika medida Proibisaun Auzensia no medida Koasaun Aprezentasaun Periodika ba arguidu nain-rua no medida Kauasaun ho osan $,3000 ba kada arguidu.
No parte Defeza nia la aseita alegasaun MP nia, ne’ebé husu Tribunál aplika Kauasaun $,3000, tanba medida Kausaun ne’e valor boot liu, nune’e husu Tribunal tenke reduz medida Kausaun tan haree ba sira nia kapasidade ekonomia.
Hafoin rona tiha alegasaun, Defeza ba arguidu nain-14, Advogadu Privadu, Octavio Cardozo hateten, durante prosesu Primeiru Interogatoriu nia kliente sira hili direitu nonok, tan ne’e kontinua ba alegasaun MP no parte Defeza.
Nia hatutan iha alegasaun MP husu Tribunál aplika medida proibisaun Auzensia, medida Kausaun osan $3,000, hodi garante prosesu investigasaun no ba arguidu nain-rua ho inisial JM no RM nia MP husu Tribunál aplika medida koasaun Aprezentasaun Periodika.
Maibé, ba parte Defeza nia la aseita ba alegasaun MP nia ne’ebé husu Tribunál aplika medida Kauasaun ba kada ema ida $3,000 ne’e, tanba tenke haree sira nia kapasidade ekonomia.
“ Ami husu Tribunál aplika medida Kauasaun ne’e tenke reduz hosi osan $3,000 no ba medida Proibisaun Auzensia no medida koasaun Aprezentasaun Periodika ba arguidu nain-rua ne’e, Defeza konkorda atu nune’e prosesu investigasaun ba iha futuru nia bele di’ak hodi produz akuzasaun,”hateten nia ba DILI Post iha Tribunal Judisial Primeira Instansia Kaikoli, Kuarta feira(15/07/2026).
Entertantu Arguidu nain-14 hosi área Kampung Baru lori ba Tribunal bazeia ba NUC. 0247/26.PNSIK.
Nune’e, Ministériu Públiku halo promosaun ba arguidu nain-14 ne’e, hamutuk krime haat (4) mak hanesan Krime Jogu ilisitu, Asosiasaun Kriminoza iha artigu, Burla informatika no krime Brankeamentu kapitais, tanba deskonfia komete kazu ilegal Scam Call Center.
Antes ne’e Polisia Nasionál Timor-Leste (PNTL) liu husi Diresaun Servisu Investigasaun Kriminal (DSIK), hamutuk ho Diresaun Servisu Informasaun Polísia (DSIP) detein sidadaun estranjeiru hamutuk nain-14 ho flagrante delitu ba alegasaun pratika online scaming game ilegal iha área Kampu Baru, Munisípiu Díli.
Durante operasaun, ekipa identifika grupu boot ne’e utiliza teknolojia avansada hodi halo operasaun iha kapital Dili.
Aliende ne’e ekipa mós prende sira nia pasaporte iha Kampung Baru hamutuk Pasaporte 14 telemovel no osan.
Iha prosesu Primeiru Interogatoriu ba arguidu nain-14, prezide hosi Juiz turnu, Marculino dos Santos Oliveira, Ministériu Públiku reprezenta Prokurador, João Marquez, arguidu nain-75 hetan asistensia legal hosi advogadu privadu, Octavio Cardozo.
Jornalista : Octavina Costa
