DiliPost.com (Ermera)- Diretor Misaun Interina USAID, Mark Anthony White hamutuk ho Vise Ministru Saúde,Jose dos Reis Magno, Kinta feira (30/11) ne’e, lansa projetu “Fortalesimentu Sistema Saúde Komunitária,” iha Munisipiu Ermera.
Projeitu refere finansia ho fundu $215,508 husi USAID ba Organizasaun Naun Govermental lokal Hamutuk Ita Ajuda Malu (HIAM Health).
Tuir karta komunikanu ne’ebe online Dili Post asesu, Sesta (1/12) ohin, katak fundu ne’ebe sira fo apoiu ho objetivu atu reforsa sistema saúde komunitária ne’ebé eziste hodi hadi’a hahalok no prátika saúde pozitivu, ne’ebé inkluzivu iha área saúde reprodutiva no nutrisaun ba inan, bebé foin moris, labarik no adolexente iha suku 10 iha Postu Administrativu Letefoho no Atsabe iha Munisipiu Ermera.
Kapasitasaun ba komunidade lokál sai nu’udar prioridade ba USAID Timor-Leste.
“Komunidade sira tenke partisipa iha planeamentu, implementasaun no monitorizasaun programa saúde hodi asegura sustentabilidade sistema saúde no reflete ema nia nesesidade,” haktuir Diretór Interinu Misaun USAID.
Nia hatutan, atividade ida-ne’e sei fó formasaun no hakbi’it família, inan isin-rua, la’en no inan-aman, banin, labarik-feto no labarik-mane adolexente, no ema ho defisiénsia atu partisipa iha identifikasaun ba sira-nia problema saúde rasik, dezenvolve planu asaun komunitária no ajuda komunidade atu sai na’in ba implementasaun no monitorizasaun.
Ministériu Saúde (MS) Timor-Leste iha enkontru Anuál Setór Saúde tinan 2021 identifika katak laiha mekanizmu ba komunidade sira atu simu no fó komentáriu/feedback kona-ba servisu saúde nian mak hanesan dezafiu prinsipál ida hodi halo monitorizasaun ba lalaok prestasaun servisu saúde nian.
HIAM Health sei utiliza fundu ida ne’e atu asegura komunidade iha mekanizmu atu hatoo sira nia preokupasaun no feedback ba pessoal saúde sira ninian atendimentu, ne’ebé sei ajuda atu hatan ka responde ba dezafiu ne’e.
Entertantu embaixada Estadus Unidus liu husi USAID servisu hamutuk ho governu Timor-Leste hodi apoia dezenvolvimentu ne’ebé efetivu no abranje.
Hahú husi tinan 2001, USAID fó ona asisténsia dezenvolvimentu tokon $323 ba Timor-Leste.
USAID apoia Timor-Leste iha sira nia esforsu atu harii nasaun ne’ebé prosperu, saudavel, no demokrátiku liu husi programa sira ne’ebé promove kresimentu ekonómiku inkluzivu no sustentável liuliu iha setór agrikultura; hadi’a saúde povu Timor-Leste nian, liuliu feto no labarik sira.
Hametin fundasaun ba governasaun di’ak – área hotu-hotu ne’ebé destaka iha Planu Estratéjiku Dezenvolvimentu Timor-Leste tinan 2011-2030. (**)
