Dílipost.com, 26 Agostu 2026 — Ministériu Saúde (MS), hamutuk ho Organizasaun Mundiál Saúde (OMS) iha Timor-Leste, realiza média briefing ba jornalista na’in 30, molok hala’o kobertura ba Enkontru Komité Rejionál OMS ba Sudeste Aziátiku (SEARO) da-79, ne’ebé sei hala’o iha Timor-Leste, husi 7 to’o 10 Setembru 2026.
Atividade média briefing ne’e iha objetivu atu fó komprensaun ba jornalista sira kona-ba ajenda, prioridade no prosesu Enkontru Komité Rejionál da-79, inklui mós orientasaun kona-ba kobertura média durante eventu internasionál ne’e.
Diretór Jerál Servisu Kooperasaun iha Ministériu Saúde, Narcisio Fernandes, hatete média briefing ne’e importante atu prepara jornalista sira molok hahú kobertura Enkontru Komité Rejionál da-79.
“ Objetivu enkontru ne’e Ministériu Saúde hamutuk Organizasaun Saúde Mundiál iha Timor-Leste konvida média tanba ajenda primeiru ita sei foka liu ba relatóriu AI no tuir kedas ho ajenda kona-ba programa no governasaun,” dehan Narcisio Fernandes iha Sala Enkontru OMS, Caicoli, Dili, Kuarta-feira.
Nia esplika katak enkontru sei envolve Estadu-Membru na’in 9 hosi rejiaun SEARO, ne’ebé sei akompaña mós hosi Nasoins Unidas no organizasaun sira hosi sosiedade sivíl.
Programa prinsipál sei hahú iha loron 7 Setembru ho serimónia abertura, no sei kontinua ho reuniaun negósiu to’o loron 10 Setembru iha Palm Spring.
Narcisio subliña katak média iha papél importante hanesan “matan no tilun” ba komunidade, tanba jornalista sira mak sei transmite informasaun kona-ba progresu no rezultadu enkontru ba públiku.
“Ita konvida média atu partisipa no sai mós parte husi Enkontru RC 79 ne’ebé importante tebes, atu nune’e média sei kontinua fahe no atualiza informasaun kona-ba progresu no atividade sira husi RC 79,” nia afirma.
Nia mós husu ba jornalista sira atu halo kobertura durante atividade tomak, hahú hosi loron primeiru to’o loron ikus, hodi públiku bele hetan informasaun atualizada kona-ba diskusaun no rezultadu enkontru.
Maski nune’e, nia hateten katak iha ajenda balun ne’ebé sei limita ba média tanba konsiderasaun konfidensiál no natureza diskusaun entre Estadu-Membru sira.
Enkuantu ne’e, Reprezentante OMS iha Timor-Leste, Arvind Mathur, hatete katak Enkontru Komité Rejionál da-79 sei sai oportunidade importante ba Timor-Leste tanba nasaun ne’e sei sai anfitriaun ba diálogu saúde rejionál no global.
“Ida-ne’e onra boot ida no mós oportunidade boot ida. Ho ida-ne’e ami husi nasaun iha sentru diálogu saúde global no rejionál, atu hatudu ita-nia progresu, fahe esperiénsia no mós aspirasaun ba rejiaun sira,” dehan Arvind Mathur.
Nia hatete Enkontru Komité Rejionál da-79 organiza hamutuk ho OMS Rejionál Sudeste Aziátiku, no Timor-Leste nu’udar nasaun anfitriaun.
Arvind konsidera eventu ne’e nu’udar momentu ida ba Timor-Leste atu fahe esperiénsia iha área saúde, aprende hosi Estadu-Membru sira seluk no hametin rede kooperasaun saúde iha rejiaun.
Nia mós subliña katak susesu Enkontru Komité Rejionál da-79 la depende de’it ba diskusaun iha sala konferénsia, maibé depende mós ba oinsá desizaun, mensajen no rezultadu sira bele to’o ba públiku.
“Ita mak parseiru atu informa no objetivu workshop ohin nian mak atu fó ba média kontekstu, mensajen prinsipál sira kona-ba Komité Rejionál da-79, ajenda, prioridade sira no mós oportunidade sira ba média,” nia dehan.
Arvind husu ba jornalista sira atu partisipa ativu no halo reportajen ho klaru, balansu no perspetiva, hodi ajuda públiku komprende di’ak liután kona-ba importánsia Enkontru Komité Rejionál OMS da-79 ba Timor-Leste no rejiaun Sudeste Aziátiku.
Enkontru Komité Rejionál OMS da-79 sei lori Timor-Leste ba sentru diálogu saúde rejionál durante loron haat, ho partisipasaun hosi Estadu-Membru sira, Nasoins Unidas, sosiedade sivíl no parte interesadu sira seluk.
Jornalista : Dílipost.com
