Dílipost.com, Loron 31 Janeiru 2026 – Ministra Saúde, Elia Amaral, fó orientasaun ba administrasaun Hostipal Nasionál Guido Valadares (HNGV) atu muda pasiente sira ne’ebé moras Dengue ba fatin karantina iha área Tasi Tolu no Lahane. Desizaun ida-ne’e halo hodi hamenus rotasaun pasiente iha HNGV no garante tratamentu no monitorizasaun ne’ebé di’ak ba pasiente sira.
Tuir informasaun ne’ebé jornalista Dili Post asesu, orientasaun ne’e diretamente husi Ministra Saúde, ne’ebé haree katak kazu moras Dengue iha komunidade kontinua sae no presiza medida espesial atu hamenus risku ba pasiente seluk sira no ba servisu saúde iha HNGV.
Atu hala’o prosesu mudansa pasiente sira, governu liuhosi Ministériu Saúde prepara ambulánsia multifunsaun hamutuk neen (6) no bus ida (1) atu tula pasiente sira ba área karantina ne’ebé Ministra Saúde determina ona. Tuir informasaun ne’ebé hetan, pasiente nain tolu sei sae iha kada ambulánsia ida, hodi asegura seguransa no konfortu pasiente durante viajen.
Atu agora dadauk, ambulánsia sira prepara hela iha área HNGV no hein hela prezensa Ministra Saúde hodi hahú prosesu tula pasiente sira sai husi HNGV ba fatin karantina iha Tasi Tolu no Lahane. Prosesu ne’e sei hala’o ho monitorizasaun husi profisionál saúde sira.
Tuir informasaun ne’ebé DiliPost.com hetan, maski pasiente balu orkalan muda ona ba fatin balun iha HNGV, ema ho suspeita moras Dengue kontinua tama nafatin ba HNGV. Situasaun ida-ne’e hatudu katak kazu moras Dengue iha komunidade seidauk hamenus no kontinua sae makas.
Tuir informasaun husi médiku balun, masál ba moras Dengue hotu normalmete iha fulan Marsu iha tinan 2025, to’o agora dadauk, seidauk iha masál, no ida-ne’e sai preokupasaun ba autoridade saúde sira.
Médiku sira mós hateten katak agora dadauk labarik sira ne’ebé moras Dengue presiza konsumu jus no bee barak atu ajuda prosesu rekoperasaun no hamenus risku komplikasaun. Ministériu Saúde apela ba pais sira atu halo atensaun ba kondisaun labarik sira no lori ba fatin saúde se iha sinal ⁰ Dengue.
Iha ne’e, Diretor/a husi Ministériu Saúde sei hala’o enkontru ho direjente Hostipal Nasionál Guido Valadares (HNGV), hodi prepara no organiza prosesu sira ne’e, atu nune’e Ministra Saúde bele mai no hahú prosesu tula pasiente sira ba fatin karantina no Lahane ne’ebé refere ona.
Iha sorin seluk, kondutór ambulánsia multifunsaun sira hateten katak sira simu ona orientasaun husi Diretor Jerál atu mai kedan ba HNGV hodi tula pasiente sira ba área karantina ne’ebé refere. Sira dehan katak informasaun ida-ne’e sira rona orkalan no prontu hela atu hala’o servisu.
“Ami prontu de’it atu tula pasiente sira ba fatin ne’ebé mak determina ona. Ida ne’e mak ami nia servisu atu tula pasiente, no ami la’o tuir orientasaun husi direjente,” dehan ida husi kondutór ambulánsia.
Tuir fontes importante balun, fatin karantina iha Tasi Tolu prepara ona desde semana ida-ne’e nia laran. Fonte sira hateten katak preparasaun fatin karantina ne’e tuir desizaun direta husi Ministra Saúde.
“Ami simu informasaun balun katak fatin karantina hadia ona, tanba ida-ne’e mak Ministra rasik deside. Pasiente sira ne’ebé moras naton sei muda ba ne’eba, maibé pasiente sira ne’ebé grave oituan sei lori fali mai HNGV atu hetan tratamentu emediata,” hateten fonte refere.
Jornalísta: Azacsi Quintão
