Dílipost.com, Loron 1 Maiu 2026 – Partidu Sosialista Timór (PST), liu husi nia Komité Sentrál, hato’o husu públiku ba forsa polítika hotu-hotu atu hametin étika, respeitu no responsabilidade iha vida polítika, iha tempu ne’ebé debate parlamentár ikus-ikus ne’e konsidera la fó kontribuisaun signifikativu ba konsolidasaun demokrasia no unidade nasionál.
Dílipost.com asesu iha Komunikado ofisiál husi Partidu Sosialista Timór (PST), tuir nia estatutu sira ne’ebé aprova hosi V Kongresu Nasionál iha loron 11 fulan-Dezembru tinan 2021, no tuir lei partidu polítiku sira ne’ebé vigora, reafirma katak, maski laiha reprezentasaun parlamentár, PST iha direitu no obrigasaun atu kontribui iha vida polítika nasaun nian. Objetivu husi kontribuisaun ne’e mak atu fó apoiu ba dezenvolvimentu nasionál no konsolidasaun Estadu Direitu Demokrátiku.
PST akompaña ho atensaun situasaun polítiku-partidária iha rai-laran, liuliu debate parlamentár sira iha semana hirak ikus ne’e. Husi observasaun ne’e, partidu haree katak maioria intervensaun sira seidauk fó kontribuisaun signifikativu ba hametin demokrasia, dezenvolvimentu institusionál, no promosaun valór fundamentál sira hanesan étika polítika, respeitu no koezaun sosiál.
Nu’udar partidu ida ne’ebé moris iha períodu rezisténsia nasionál no kontribui ba luta libertasaun Timor-Leste, PST, ho lejitimidade tomak, hato’o apelu públiku tuir mai:
1. Respeitu ba lideransa histó rika – Presiza valoriza no respeita lider hotu-hotu ne’ebé kontribui ho brani ba libertasaun pátria no kontinua servisu ba povu.
2. Étika iha komunikasaun polítika – Deklarasaun públika, kampaña polítika no intervensaun parlamentár tenke bazeia ba morál, étika no respeitu ba dignidade umana, liuliu ba lider nasionál sira.
3. Primazia Direitu no Prezunsaun Inosénsia – Iha Estadu Direitu, prinsípiu prezunsaun inosénsia tenke prevalese. Ator polítiku hotu-hotu presiza respeita norma konstitusionál sira.
4. Responsabilidade iha diskursu públiku – Prinsípiu “sé de’it maka la investiga laiha direitu atu ko’alia” tenke sai guia ba intervensaun polítika sira.
5. Intervensaun konstrutiva iha Parlamentu – Deputadu sira iha direitu atu ko’alia, maibé tenke halo ne’e ho respeitu ba norma no kontribui ba unidade nasionál.
6. Ezerse direitu ho responsabilidade – Sidadaun bele kestiona autoridade sira, maibé tenke halo tuir lei no ho responsabilidade.
7. Respeitu ba lider Estadu – Respeitu ba Xefe Estadu no Xefe Governu mak obrigasaun sidadaun hotu-hotu nian atu hametin estabilidade no valór nasionál sira.
8. Formasaun kuadru polítiku – Forsa polítika sira tenke investe iha formasaun lider sira ne’ebé iha konxiénsia nasionál, koñesimentu histó riku no respeitu ba valór kulturál.
Bazeia ba konsiderasaun sira ne’e, PST manifesta nia apoiu ba inisiativa sira husi Prezidente Repúblika, Dr. José Ramos-Horta, liuliu iha atribuisaun pasaporte no nomeasaun diplomátika sira, ne’ebé tuir Konstituisaun mak kompeténsia Prezidente nian.
PST mos hateten katak, iha kontextu besik eleisaun prezidensiál, aktor polítiku sira tenke evita deklarasaun sira ne’ebé bazeia de’it ba boatu ka akuzasaun la iha prova legál, tanba ida-ne’e bele prejudika konsolidasaun demokrasia no Estadu Direitu.
Ikus liu, PST konvida forsa polítika hotu-hotu atu hametin unidade iha diferensa sira, respeita étika polítika no kontribui ba transmisaun valór nobre sira ba jerasaun futuru.
Jornalista : Azacsi Quintão
