Dílipost.com, Loron 24 Fevereiru 2026 – Konsellu Administrasaun Autoridade Nasional Komunikasaun (ANC) iha loron 23 Fevereiru 2026 aprova ofisialmente Esperança Timor Oan Lda (ETO) atu akizita 57,06% asaun hosi Timor Telecom S.A., ne’ebé halo ETO sai maioria asionista no detentor poder kontrolu iha kompanhia telekomunikasaun refere.
Dílipost.com asusu iha komunikadu ofisiál, Konsellu Administrasaun Autoridade Nasional Komunikasaun (ANC), hafoin halo observasaun, analiza no avaliasaun bazeia ba lejislasaun no regulamentu komplementar aplikável, realiza enkontru iha loron segunda-feira, 23 Fevereiru 2026, hodi delibera kona-ba tranzasaun akizasaun asaun iha Timor Telecom S.A.
Iha enkontru refere, Konsellu Administrasaun ANC aprova pedidu husi Esperança Timor Oan Lda (ETO) atu halo akizasaun hamutuk 57,06% asaun hosi Timor Telecom S.A.
Tuir deliberasaun ne’e, durante prosesu tranzasaun akizasaun to’o kompletu, ETO Lda sei sai maioria asionista no iha poder kontrolu ba Timor Telecom S.A., tuir dispozisaun legal ne’ebé vigora.
Enkontru Konsellu Administrasaun ne’e lidera hosi Prezidente ANC, Sr. Flávio Cardoso Neves.
Deliberasaun kona-ba aprovasaun ba ETO Lda atu halo akizasaun asaun Timor Telecom S.A. hahu vigor iha Díli, loron segunda-feira, 23 Fevereiru 2026.
Jornalista : Azacsi Quintão
