Dílipost.com, Loron 17 Fevereiru 2026 – Komunidade Xineza iha Timor-Leste halibur malu iha Xina Maromak nia fatin hodi halo sangbaia kulturál atu marka selebrasaun Tinan Foun Xineza. Depois hosi ritual no sangbaia ne’e, lideransa komunidade sira ba hato’o komprimentu ba Embaixadór China mai Timor-Leste, hanesan parte husi tradisaun loron bo’ot ne’e.
Prezidente ACCCTO, Katleen Gonçalves hateten katak komunidade Xineza konta ho ema hamutuk rihun 20 iha Timor-Leste, no hamutuk ho komunidade Xineza sira iha mundu ne’ebé to’o millaun 20 resin, selebra festa pasajen Tinan Foun Xineza ho alegria Festival Primavera nian.
“Ita hotu hatene katak komunidade Xineza hamutuk iha selebrasaun anu novu Xineza nian, lori alegria Festival Primavera mai iha ita nia rai laran, no mos halo koperasaun ekonómika, komersiál no kulturál,” hateten Katleen ba jornalista sira iha Xina maromak, Tersa-feira(17/02/2026).
Nia mos haktuir katak iha Timor-Leste, komunidade Xineza konsidera loron ne’e hanesan loron espesiál tebes. Maibé, to’o agora seida’uk sai feriadu públiku ofisiál ba komunidade Xineza, maski iha Timor-Leste komunidade relijiozu sira hanesan komunidade Islamiku hetan ona loron rua feriadu públiku.
“Loron Tinan Foun Xineza hetan toleránsia di’ak, maibé ami mos hatama ona karta ba Parlamentu no Governu atu husu bele tau atensaun no importánsia ba loron ida ne’e,” nia dehan.
Prezidente ACCCTO husu ba komunidade Xineza sira kontinua servisu ho didi’ak no kontribui ba dezenvolvimentu nasaun Timor-Leste. Nia mos apela ba membru komunidade sira ne’ebé envolve iha setor konstrusaun atu fó prioridade ba servisu ne’ebé iha kualidade no responsabilidade.
Iha parte seluk, Vise-Primeiru-Ministru Francisco Kalbuadi Lay mos marka prezensa iha selebrasaun ne’e. Nia hato’o boas festa ba Embaixadór no komunidade Xineza sira ne’ebé hamutuk iha fatin ne’e atu selebra sira-nia loron bo’ot.
“Hau husu ba Nai Maromak atu tulun ita hotu-hotu. Amu Pope Francis mos fó hela lia-fuan kona-ba fraternidade umana, katak iha loron saida deit ita bele festeza hamutuk nudar ema ida deit. Hau mai hato’o boas festa ba Embaixadór ho nia ekipa no komunidade Xineza iha Timor-Leste,” hateten Vise-Primeiru-Ministru.
Selebrasaun Tinan Foun Xineza iha Timor-Leste ne’e hatudu toleránsia relijioza, diversidade kulturál no relasaun amizade ne’ebé metin entre povu Timor-Leste no povu Xina.
Iha fatin hanesan Embaixadóra Xina mai Timor-Leste, Wahng Wenli hateten selebrasaun tinan foun xina nian sira hakarak dedeka oinsa hametin koperasaun Xina ho Timor-Leste ba iha futuru.
Nia realsa lori komunidade Xineza iha Timor-Leste hato’o haksolok iha tinan foun Xina nian, espera selebrasaun tinan foun ida ne’e komunidade xina iha Timor-Leste bele moris iha paz estabilidade nia laran hodi kontribui ba prosesu dezenvolvimentu iha Timor-Leste.
“Husu mos sidadaun Xineza iha Timor-Leste hodi hametin kultura no indentidade promove paz iha Timor-Leste,” nia konklui.
Jornalista : Azacsi Quintão
