DiliPost.com-Prezidente Repúblika (PR) Jose Ramos Horta entrga Prémiu Direitus Umanus Sérgio Vieira de Mello Edisaun ba dala 18 ba vensedor na’in neen (6), iha Palásiu Prezidensiál Nicolau Lobato, Kuarta feira (10/12).
Premiu Direitus Umanus Sérgio Vieira de Mello nu’udar inisiatif ne’ebé lansa iha tinan 2008 husi PR Ramos Horta, ho objetivu atu kontribuisaun husi sidadaun timoroan, sidadaun estranjeiru, organizasaun governamentál ka naun-governamentál sira, ba prosesu promosaun, protesaun no defeza direitus umanus iha Timor-Leste.
Premiu ida-ne’e fo tinan-tinan husi PR iha loron 10 fulan-Dezembru, data adosaun Deklarasaun Universál Direitus Umanus husi Asembleia Jerál Nasoins Unidas, nu’udar Loron Internasionál Direitus Umanus nian.
Prémiu sira ne’e fó iha kategoria rua ne’ebé diferente, maka iha Direitu Sivíl no Polítiku, ne’ebé fó ba indivíduu no organizasaun sira ne’ebé fó kontribuisaun notável ba promosaun no protesaun direitu sivíl no polítiku sira iha nasaun.
Iha Direitu Ekonómiku, Sosiál no Kulturál, atribui ba sira ne’ebé maka fó ona kontribuisaun signifikativu ba promosaun no defeza Direitu Ekonómiku, Sosiál no Kulturál. Vensedor sira ne’e hili tuir prosesu avaliasaun ida-ne’ebé rigorozu husi Konsellu Onra, ne’ebé halo analiza ba aplikasaun sira no hala’o vizita verifikasaun iha fatin ba kandidatura sira ne’ebé tama ona iha lista badak.
Premiu ne’e for tuir Dekretu Prezidente Republika Nu. 129/2025, pesoal no organizasaun tuir mai ne’e mak simu Prémiu Direitus Umanus “Sérgio Vieira de Mello” ba Edisaun da-18:
Kategori primeiru : Direitu Sivíl no Polítiku, Isabel Antónia da Costa Galhos, Madre. Leonie Manalu, FCJM, Julião Cardoso
Kategoria Segundu : Direitu Ekonómiku, Sosiál, no Kulturál; Kooperativa Comsoi, Grupo Monocura, Asosiasi Esperansa Feto Difisiénsia.
“Iha aniversáriu Deklarasaun Universál Direitus Umanus, hanesan onra ba ita atu rekoñese pesoal sira ne’ebé aten-barani no organizasaun sira ne’ebé dedikadu,”afirma Prezidente Ramos-Horta.
Aliende xefi estadu dehan sira nia kompromisu metin ba justisa, bermartabat no igualdade mak fundamentu ba demokrasia nasaun nian no esperansa ba futuru.
“Sira reprezenta duni espíritu Sérgio Vieira de Mello, ne’ebé ninia legadu kontinua inspira ita-nia esforsu koletivu ba Timor-Leste ida ne’ebé justu liu,” konklui PR Horta.
Bazea ba Dekretu-Lei Númeru 15/2009 loron 18 fulan-Marsu, vendor ida-idak simu sertifikadu no prémiu osan hamutuk U$10,000. (lx/julia)
