DiliPost.com-Primeiru-Ministru (PM), Kay Rala Xanana Gusmão, hamutuk ho membru IX Governu Konstitusionál hato’o parabéns bá estudante timoroan sira ne’ebé manán medalla iha kompetisaun siénsia internasionál 11.ª ASEAN Plus Three Junior Science Odyssey (APT JSO) iha Filipina no Malázia husi loron 5 to’o 11 fulan-jullu 2026.
Governu hato’o parabéns ne’e molok hahú Sorumutu Konsellu Ministru (KM) ne’ebé hala’o iha Palásiu Governu, Kuarta feira (22/07) ne’e.
Apresiasaun ne’e tanba delegasaun Timor-Leste hetan medalla osan-mean ida, osan-mutin tolu no bronze rua.
PM elojia ho dedikasaun, perseveransa no talentu estudante sira, no konsidera sira-nia susesu nu’udár fonte orgullu nasionál no inspirasaun bá foin-sa’e timoroan sira atu kontinua buka prestasaun iha área siénsia, teknolojia, inovasaun ho edukasaun.
Governu mós hato’o apresiasaun bá profesór sira, lideransa eskola no família sira ne’ebé fó apoiu bá dezenvolvimentu estudante sira nian hodi reprezenta Timor-Leste ho di’ak iha nível internasionál.
Kompetisaun anuál ne’e halibur estudante sira hosi Estadu membru ASEAN sira no parseiru tolu hosi bloku Nordeste Aziátiku nian – Xina, Japaun no Koreia-Súl – hodi promove koñesimentu sientífiku, inovasaun, kriatividade no kooperasaun rejionál.
Ida-ne’e mós enkoraja kolaborasaun kona-bá siénsia, sustentabilidade no dezenvolvimentu abilidade sira sékulu XXI nian.
Timor-Leste reprezenta hosi estudante na’in neen hosi eskola sira iha Dili mak hanesan Alandrinho Corbafo Caunan hosi Colégio Paulo VI; Angelica da Costa Sequeira hosi Eskola Bázika Sentrál (EBC) Bidau Akadiruhun; Mendelina del Carmen Mascarenhas hosi EBC 30 de Agosto; Nelia Patricio Soares hosi EBC São Pedro; Peter Carlos Chima Anaje hosi EBC São José Operário; no Salvadór da Costa Pacheco hosi EBC Esperança da Pátria.
Liutiha loron balun, Estudante sira hosi Eskola Ensinu Báziku St. António Teulale (ESSA Senior) no Eskola Sekundária St. António Teulale (ESSA Senior) iha Baucau, ho medalla 10 no Prémiu Embaixadór Juventude hafoin dezempeñu ne’ebé destakadu iha Konferénsia Siénsia, Teknolojia, Inovasaun no Kreatividade (STICK2020).
Delegasaun Timor-Leste manán medalla osan-mean lima reprezenta hosi Angel Grace Costa De La Rosa, Yinei Doena Maria Da Costa Belo, Jeninho Geovanio Maria Alves Xavier, Geovania Bruno Sarmento, Brigida Filita Da Costa Guterres.
Manán osan-mutin lima reprezenta hosi Florbella Ezania Osório Da Silva, Letícia Greydis Costa Valente, Jolly Petra Daol, Genijia Lucilia Imaculada Pereira, Herfia Febiana Carlos iha kompetisaun internasionál Siénsia, Teknolojia, Enjeñaria, Arte, no Matemátika (STEAM) ne’ebé hala’o iha Kuala Lumpur hosi loron 15 to’o 19 jullu, hodi marka dezempeñu ida ne’ebé maka’as liu iha eventu anuál ne’e.
STICK halibur estudante sira, profesór sira, peskizadór sira no inovadór foin-sa’e sira hosi mundu tomak hodi aprezenta peskiza sientífika no projetu inovasaun sira hodi promove hanoin krítiku, kreatividade, komunikasaun sientífika no kolaborasaun internasionál. (aza)
