Dílipost.com, Xina, 4 Agostu 2026 – China International Communication Group (CICG), liuhosi Institute for International Studies and Advanced Training (IISAT), taka ofisialmente Semináriu ba Profisionál Mídia husi Timor-Leste (TL) depois programa formasaun durante loron 20.
Programa ne’e involve jornalista 24 husi TL ho objetivu atu hametin kooperasaun iha área mídia, haburas komprensaun mútua entre povu Xina no TL, no haforsa papél mídia hanesan ponte ba amizade no parseria estratéjika entre nasaun rua.
Iha serimónia ne’e Diretór AdjuntuInstitute for International Studies and Advanced Training (IISAT), Li Hengtian, hato’o apresiasaun ba partisipante sira no hateten katak programa ida-ne’e la’ós deit fó formasaun profisionál, maibé mós sai ponte atu hametin amizade no komprensaun mútua entre povu Xina no Timor-Leste.
” Programa ida-ne’e remata ho susesu, maibé remata programa la’ós pontu ikus. Ida-ne’e mak pontu hahú foun ida atu kontinua hametin troka hanoin no kooperasaun entre mídia Xina no Timor-Leste,” dehan Li Hengtian iha taka ofisialmente Semináriu ba Profisionál Mídia husi Timor-Leste Beijing Xina.
Nia hatutan katak durante loron 20, partisipante sira aprende kona-ba kondisaun Xina kontemporáneu, Inisiativa Belt and Road, kooperasaun Xina–ASEAN, modernizasaun ho karakterístika Xina no papél mídia iha komunikasaun internasionál. Programa ne’e mós inklui vizita ba patrimóniu istóriku, instituisaun mídia, no projetu dezenvolvimentu iha Beijing no Guangxi.
Aliende ne’e atividade sira-ne’e fó oportunidade ba jornalista Timor-Leste atu haree diretamente dezenvolvimentu Xina no komprende oportunidade kooperasaun ne’ebé iha entre Xina, Timor-Leste no ASEAN.
” Atividade sira-ne’e aprezenta Xina ida ne’ebé loos, dezenvolve hela no nakloke ba mundu, no fó komprensaun direta kona-ba oportunidade boot ba kooperasaun entre Xina no Timor-Leste,” nia dehan.
Nia mós enkoraja jornalista sira atu sai ponte entre povu rua liu husi servisu jornalístiku.
” Ami hein katak imi sei sai mensaxeiru ba Xina ne’ebé loos, fahe esperiénsia no impresaun verdadeira ne’ebé imi hetan iha Xina ba povu Timor-Leste no ASEAN,” katak Li Hengtian.
Iha parte seluk, Xefe Delegasaun Mídia Timor-Leste no reprezentante Sekretaria Estadu ba Komunikasaun Sosiál (SECOMS), Augusto Sarmento dos Reis, hato’o agradese ba CICG no Governu Repúblika Popular Xina tanba organiza programa formasaun ida-ne’e.
Nia dehan katak durante loron 20, jornalista Timor-Leste sira hetan koñesimentu foun no esperiénsia direta kona-ba dezenvolvimentu Xina.
” Durante loron 20, ka oras 480, ita aprende hamutuk, fahe esperiénsia no harii amizade ne’ebé forte,” dehan Augusto.
Tanba ne’e maioria jornalista sira uluk koñese Xina liuhosi televizaun, filme no mídia sosiál. Maibé, depois vizita ba Beijing no Guangxi, sira komprende liután kona-ba istória, kultura no progresu modernu Xina.
Nia dehan katak livru Xi Jinping: The Governance of China no palestra sira durante programa ajuda partisipante sira komprende modelu dezenvolvimentu Xina.
” Liuhusi livru ne’e no esperiénsia direta durante programa ida-ne’e, ami komprende katak sistema mídia no informasaun iha Xina iha karakterístika rasik ne’ebé la fasil atu sukat ho padraun Oksidente,” nia hateten.
Delegasaun Timor-Leste vizita mós cidade Nanning no Liuzhou iha Rejiaun Autónoma Guangxi Zhuang, ne’ebé sira observa dezenvolvimentu teknolojia, intelijénsia artifisiál, transporte modernu no preservasaun kultura tradisionál.
Nia dehan esperiénsia ida-ne’e hatudu katak dezenvolvimentu ekonomia no teknolojia bele lao hamutuk ho preservasaun kultura.
Augusto mós hato’o apresiasaun ba ekipa CICG ne’ebé acompanha delegasaun durante programa tomak no konsidera katak relasaun entre partisipante sira sai besik liután.
“Iha semana dahuluk ami seidauk koñese malu. Iha semana daruak ami sai besik liután. No iha semana datoluk, ami sente hanesan família ida,” nia dehan.
Iha remata nia diskursu, Augusto reafirma katak programa ida-ne’e la’ós deit fó benefísiu ba jornalista sira, maibé mós kontribui ba hametin relasaun diplomátika no kooperasaun mídia entre Timor-Leste no Xina.
“Ami mai Xina hanesan kopu mamuk sira. Iha tempu badak ida-ne’e, CICG enxe ami-nia kopu to’o nakonu ho koñesimentu, esperiénsia no inspirasaun,” dehan Augusto.
Serimónia taka remata ho entrega sertifikadu ba jornalista 24 husi TL, fotografia hamutuk no reafirmasaun hosi parte rua atu kontinua hametin kooperasaun iha área mídia, komunikasaun no troka entre povu TL no Repúblika Popular Xina iha futuru. (aza)
