DiliPost.com-Ministru Obras Públika (MOP), Samuel Marçal, halo vizita ofisiál ba Atauro hodi observa progresu servisu infraestrutura sira, inklui estrada, bee no eletrisidade, ne’ebé konsidera importante ba dezenvolvimentu turizmu no ekonomia lokal.
Iha nia vizita, Ministru Samuel Marçal informa mai ho ekipa Governu no autoridade lokal sira atu hare diretamente progresu servisu iha ilha Atauro tomak.
Nia esplika katak la’ós deit observa estrada, maibé mos fokus ba problema bee no eletrisidade ne’ebé seidauk sufisiente iha área balun.
Nia hare mos potensialidade boot iha setor turizmu, tanba iha loron hirak hanesan Segunda to’o Domingo turista lokal barak hahú mai Atauro.
“Horiseik hau mai ho ekipa ida atu hare progresu servisu iha Atauro tomak, la’ós deit estrada maibé mos bee no eletrisidade ne’ebé falta tebes iha ne’e,”hateten Ministru Samuel ba Jornalista Atauro Vila-Sábadu (25/04/2026).
Governante ne’e relata kona ba movimentu turista ne’ebé aas hatudu sirkulasaun ekonomia iha rai laran hahú lao di’ak. Tan ne’e mak infraestrutura hanesan estrada importante tebes atu fasilita movimentu ema no bens.
“Estrada importante tebes atu fasilita movimentu ema no ekonomia, liuliu atu promove turizmu ba lokal no estranjeiru,” teniknl Ministru ne’e.
Nia mos ko’alia ho autoridade lokal sira kona-ba jestaun tasi ibun, hodi prevene konstrusaun uma aleatória no fo oportunidade ba investimentu komersiál hanesan restaurante no otél.
“Ita presiza jere tasi ibun sira ho di’ak atu bele utiliza ba negosiu turizmu no atrai investimentu,”hateten MOP.
Iha fatin hanesan, nain ba Kompañia TINOLINA Unipesoal Lda Agustinho Gomes esplika katak projetu estrada ne’e hahú implementa iha fulan Janeiru no agora progresu atinji ona 45%. Projetu ne’e kobre estrada husi Vila Atauro to’o Bikeli ho distánsia 17 kilometru no orsamentu hamutuk $7 millaun.
“Ami hahú iha Servisu iha fulan Janeiru no agora tau alkatraun too ona 45%,” haktuir nain kompañia.
Nia admite katak projetu hasoru dezafiu tamba falta material alkatraun, ne’ebé liga ho krize global no konflitu iha Mediu Oriente.
“Se alkatraun tama iha tempu besik, ami bele finaliza iha fulan Juñu ka Juillu, maibé se la iha ami la bele kontinua servisu,” nia dehan.
Aleinde ne’e reprezentante Komunidade Atauro ,Leo Komakose sente kontente ho progresu estrada ne’e, tanba durante tempu naruk sira seidauk hetan infraestrutura hanesan ne’e.No Sira mos rekuiñese esforsu governu iha realizasaun promesa dezenvolvimentu.
“Ami senti kontente tebes tanba agora mak ami hare estrada di’ak iha Atauro,” sublina Leo.
Maski nune’e, komunidade husu governu atu kontinua hadi’a bee, drenajen no eletrisidade, tanba elementu hirak ne’e importante atu asegura estrada bele dura naruk.
“Ami husu governu atu hadia bee no drenajen,Se bee no drenajen la di’ak, estrada sei la dura to’o tempu naruk,” dehan komunidade ne’e.
Entretantu Projetu rehabilitasaun estrada urbana iha Atauru dadaun atinji ona 70%, no governu planeia kontinua dezenvolve infraestrutura báziku iha área rurál no urbanu.
Ligasaun estrada entre suku no aldeia sira sei prioridade atu asegura sirkulasaun produtu lokal no promove kresimentu ekonomia.
Ho investimentu iha estrada, bee no eletrisidade, governu espera Atauru bele sai destinasaun turizmu ne’ebé forte no sustentavel iha Timor-Leste.
𝐉𝐨𝐫𝐧𝐚𝐥𝐢𝐬𝐭𝐚 : 𝐉𝐮𝐥𝐢𝐚 𝐋𝐮𝐫𝐝𝐞𝐬 𝐝𝐨 𝐑𝐞𝐠𝐨.
