Dílipost.com, Loron 24 Dezembru 2025 – Sekretáriu Estadu Asuntu Toponímia no Organizasaun Urbana (SEATOU), Germano Santa Brites, hateten katak lia-fuan ne’ebé Reitór Universidade da Paz (UNPAZ) hato’o iha atividade graduasaun, la’os fatin nem tempu atu ko’alia kona-ba servisu SEATOU nian.
Germano dehan katak iha tempu graduasaun, Reitór nia obrigasaun mak avalia kualidade dosente sira ne’ebé hanorin ho di’ak no produz estudante no graduadu sira ne’ebé iha matenek no kualidade, husi semester 1 to’o 8, atu bele prepara an ba munisípiu serbisu no kontribui ba dezenvolvimentu rai nian.
“Reitór la’os atu ko’alia fali servisu SEATOU nian ne’ebé halo iha terenu. Pelo kontráriu, Reitór hasai lia-fuan ho tom bandalizmu no palerma, no uza forsa lia-fuan iha fatin públiku,” dehan Germano ba jornalista sira iha Ministériu Administrasaun Estatal(MAE) ohin.
Nia lembra katak bainhira nia estuda iha UNPAZ, iha semester 1, estudante sira simu ona materiál etika no moral, husi dosente Romeu, ne’ebé hanorin kona-ba maneira ko’alia no respeitu ba ema seluk.
Segundo Germano, ema ida ne’ebé iha títulu lisensiatura ka doutoramentu la signifika katak bele ko’alia ho lia-fuan bandalizmu ka palerma ba ema seluk.
“Lia-fuan palerma bele dehan iha uma laran de’it, ba ita nia oan. Maibé iha fatin públiku, ba estudante ka sidadaun seluk, ita labele ko’alia hanesan ne’e, tanba etika no moral la permite,” nia hateten.
Nia mos salienta katak iha tempu graduasaun la’os momentu kampaña polítika. Germano lembra katak antes ne’e, Reitór hateten ba estudante sira atu labele vota ba partido ne’ebé ‘bosok povu’, maibé agora IX Governu Konstitusionál lidera hela husi Primeiru-Ministru Kay Rala Xanana Gusmão.
“Karik iha tempu kampaña, ko’alia hanesan ne’e sei hetan komprensaun. Maibé agora iha graduasaun, materiál ko’alia tenke foka ba graduadu sira nia kualidade no saida mak sira bele kontribui ba munisípiu ida-idak,” dehan nia.
Germano hateten tan katak SEATOU halo servisu iha terenu tuir dekretu-lei no liña kordenasaun ho ministériu kompetente sira. Servisu SEATOU la’os servisu Reitór nian, no ema hotu ne’ebé ko’alia kona-ba organizasaun urbana iha Munisípiu Dili tenke hatene liña kordenasaun governamental.
Nia observa katak husi Governu Primeiru to’o Governu VIII, sidade Dili senti hela dificuldade barak, maibé agora iha Governu IX, halo netik hela bu’at ruma no presiza koperasaun husi ema hotu.
“SEATOU ho nia ekipa halo servisu ba ema hotu-hotu, la’os ba ema ida ka grupu ida de’it. Tanba ne’e husu komprensaun no respeitu,” nia afirma.
Iha remata, Germano rekonesé katak sidadaun hotu, inklui ema iha títulu doutoramentu, iha direitu atu kritika governu. Maibé nia sublinha katak kritika tenke hato’o ho etika no moral.
“Hau husu atu labele uza lia-fuan bandalizmu no palerma iha fatin. Maski hau hanesan Sekretáriu Estadu kiik, ita-boot sira ho pozisaun boot tenke, ko’alia ho respeitu no moral,” nia remata.
Jornalista : Azacsi Quintão
