DíliPost.com loron 23 Dezembru 2025 – Iha selebrasaun Natal 2025 no tinan foun 2026, Arsebispu Metropolitanu Dili, Cardeal Dom Virgílio do Carmo da Silva, SDB, hato’o mensajen kbiit-na’in ida ba sarani sira hotu iha Timor-Leste. Sua Eminénsia konvida sarani sira atu deskobre fali sentidu loloos husi Natal, ne’ebé dala barak lakon tiha iha mundu komersiál nia laran.
Promesa Maromak nian ne’ebé sai Realidade, Foti hosi profesia Profeta Isaias nian, Cardeal afirma katak Natal la’ós de’it poezia furak ida, maibé promesa Maromak nian ne’ebé sai realidade. Maromak, nu’udar Prínsipe Damen nian, tama iha istória umanidade nian la’ós atu konkista ho “espada no kora”, maibé liuhosi Kosok-oan kbiit-laek ida iha sidade ne’ebé ema la koñese.
“Liafuan Maromak nian ne’ebé halo an ba ema no hola isin ita ema nian atu kura ita husi laran,” dehan cardeal iha Camara Eclesiastica Lecidere.
Presepiu: Eskola Pobreza no Humildade
Iha mensajen ne’e, Dom Virgílio foti Presepiu nu’udar sasin ba Maromak nia fuan.
Nia esplika katak iha Presepiu, Maromak hili pobreza duké kbiit, no hili prosimidade (besik) duké distánsia.
Cardeal mós fó hanoin katak maske mundu ohin loron dekoradu ho ai-hun Natal no naroman oioin, mensajen loloos husi Presepiu mak ksolok ne’ebé kontra ho mundu komersiál.
Ksolok loloos La’ós iha halibur sasan ba an rasik, maibé iha kbiit atu fahe an ba Maromak no ba ema seluk.
Identidade Natal, Natal akontese ohin loron iha Eukaristia, iha ema kiak sira, iha família, no iha sakrifísiu loron-loron nian.
Konvite ba Perdua no Dame
Hasoru mundu ida ne’ebé nakonu ho odiu, funu, no indiferensa, Cardeal konvida sarani sira atu adora Kosok-oan Jesus liuhosi hahalok konkretu.
Perdua malu Haka’as an atu perdua hirak ne’ebé hakanek ita-nia fuan, Solidariedade: Sai belun ba sira ne’ebé sente mesak no abandonadu, Hahalok haraik-an, Halakon arogánsia no ambisaun ne’ebé fahe malu.
Misaun sai “Kristu seluk” no Tinan Foun 2026
Iha parte ikus, Sua Eminénsia husu ba sarani sira atu hafoun sira-nia vokasaun atu sai “Kristu ida seluk” no sai naroman ba fatin sira ne’ebé nakukun.
Ba tinan foun 2026, Cardeal husu sarani sira atu tama ho konfiansa: “Mai ita tau ita-nia konfiansa iha Kosok-oan, Maromak-oan iha ita-nia leet; ho Nia, 2026 sei sai tinan rahun di’ak no bensan mai ita hotu.”
Mensajen ne’e termina ho orasaun haraik-an: “Glória ba Maromak iha leten aas ba, no pas ba ema hotu ne’ebé buka dame.”
Jormalista : Azacsi Quintão
