Dilipost.com, 22 Dezembru 2025— Prezidente Repúblika (PR), José Ramos-Horta ho Primeiru-Ministru (PM), Kay Rala Xanana Gusmão husu bá povu liu-liu foin-sa’e sira atu mantein páz no estabilidade durante selebrasaun loron bo’ot Natal no tinan foun 2026.
Apelu ne’e transmite direta hosi Primeiru-Ministru, Xanana Gusmão hafoin Reuniaun Konsellu Superiór Defeza no Seguransa, iha Palásiu Prezidensiál Bairru-Pité, segunda (22/12/2025).
“Prezidente mós hakarak hato’o katak, ambiente hanesan ne’e iha Natal nia laran ho fim do ano ita hotu hamutuk kontente hodi haree bá saida mak ita halo ona iha 2025 nune’e buat ne’ebé presiza kurije tenke kurije. Presiza halo buat foun tenke halo buat foun atu lori nafatin rai ne’e ba dalan loos. Boas festa Santu natal no ksolok tinan foun bá imi hotu,” PM Xanana hateten.
Reuniaun Konsellu Superiór Defeza no Seguransa ne’e haree liu bá problema seguransa iha rai-laran no mós haree asuntu seluk ne’ebé públiku la presiza atu hatene.
Prezidente Repúblika agradese tebtebes bá sosiedade tomak tanba klima páz, dame no domin ne’ebé akontese, iha duni buat ruma mosu maibé la foti hanesan obstákulu bo’ot tanba la óho malu.
Jornalista : Azacsi Quintão
