Dílipost.com Loron 23 Dezembro 2025 – Prezidente Repúblika Demokrátika Timor-Leste, José Ramos-Horta, hato’o mensajen Natal nian ba povu timoroan hotu, ho laran luak no votus kmanek, iha okazia selebra Natal ne’ebé to’o ona mai nasaun.
Prezidente Horta hein katak Natal lori pás, ksolok no esperansa ne’ebé metin ba povu Timor-Leste hotu.
“Natál mak tempu sagradu ida, tempu ne’ebé fuan sira iha mundu tomak hanoin hikas kona-ba mensajen forte ida husi moris foun ne’ebé humilde iha Belém: mensajen kona-ba naroman iha nakukun laran, pás envez de konfrontu, no domin ba malu. Mensajen ne’e ko’alia kle’an kona-ba ita-nia istória rasik no ita-nia espíritu kolektivu,” dehan Prezidente iha Komunikadu Ofisiál.
Prezidente Ramos-Horta hatete katak Timor-Leste hanesan nasaun ida-ne’ebé hala’o viajen naruk iha tempu nakukun, maibé bele sai liu husi naroman fiar no esperansa nian. “Loron-foun ida ne’ebé di’ak liu mak ita-nian atu harii hamutuk loron-loron,” tanba liu hosi unidade no reziliénsia povu nian.
Iha tinan 2025 nia laran, Prezidente husu atu povu Timor-Leste kontinua lao hamutuk hanesan nasaun ida de’it, hasoru dezafiu sira ho reziliénsia, no selebra progresu ho unidade no solidariedade.
Nu’udar Prezidente Repúblika, nia hateten katak orasaun Natal nian ne’ebé boot liu mak unidade nasionál no pás ne’ebé dura, hanesan fundasaun metin ba dezenvolvimentu nasaun nian.
PR mos konvida povu atu fó liman ba sira ne’ebé sente mesak, ajuda sira ne’ebé presiza, no simu ema hotu ho laran nakloke, hanesan loloos espírito Natal nian.
Ba labarik no jovem Timor-Leste sira, Prezidente hein katak sira-nia ksolok no hamnasa sai inspirasaun ba futuru nasaun nian. “Imi mak ita-nia prezente boot liu hotu no ita-nia futuru,” dehan nia.
Ba ferik no katuas sira, ne’ebé lori matenek no esperiénsia ba viajen nasaun nian, Prezidente husu atu fó onra, domin no respeitu.
Prezidente Ramos-Horta mos hato’o mensajen besik ba família timoroan ida-idak, atu sira-nia uma sira nakonu ho bensaun, hamutuk no gratidaun. Iha tempu Natal nian ne’e, nia mos halo orasaun espesial ba sira ne’ebé hasoru todan, sira ne’ebé moras, luta ka sente triste tanba lakon ema hadomi, atu sira hetan konfortu no forsa foun husi komunidade no esperansa Natal nian.
Haree ba Tinan Foun 2026, Prezidente konvida povu hotu atu lori naroman Natal nian ba oin, hodi orienta asaun sira ba justisa ne’ebé boot liu, kompaixaun ne’ebé kle’an liu, no dezenvolvimentu sustentável ba ema hotu.
“Hamutuk, mai kontinua harii Timor-Leste ida ne’ebé sidadaun ida-idak bele moris iha dignidade no pás nia laran,” hateten nia.
Iha konkluzaun, Prezidente José Ramos-Horta deseja ba povu Timor-Leste hotu Natal ida ne’ebé nakonu ho pás Kristu nian no Tinan Foun 2026 ne’ebé nakonu ho saúde, prosperidade no susesu komún, hodi husu Maromak nia bensaun ba ema ida-idak no ba nasaun Timor-Leste tomak.
Jornalista : DILI POST
