Dílipost.com, 15 Jullu 2026 – Jornalista na’in 24 hosi mídia konvensionál no plataforma dijitál Timor-Leste (TL) nian partisipa iha programa formasaun profisionál durante semana tolu iha Repúblika Populár Xina. Delegasaun ne’e hahu viajen ba Xina iha loron-tersa to’o iha Beijing Xina iha loron Kuarta-feira 15 Jullu 2026.
Programa formasaun ne’e organiza hosi Institute of International Studies and Advanced Training (IISAT) iha kolaborasaun ho The China International Communications Group (CICG), liuhosi kooperasaun entre Embaixada Repúblika Populár Xina iha Timor-Leste no Governu Timor-Leste, liuhosi Sekretaria Estadu Komunikasaun Sosiál (SEKOMS).
Antes delegasaun ne’e atu husik Timor-Leste, Sekretáriu Estadu Komunikasaun Sosiál, Expedito Loro Dias Ximenes, hato’o agradesimentu ba Governu Xina tanba kontinua fó apoiu ba dezenvolvimentu kapasidade jornalista Timor-Leste nian, liuliu iha área jornalizmu investigativu no kampu profisionál sira seluk ne’ebé relevante.
Iha oportunidade ne’ebá, Sekretáriu Estadu mos husu ba jornalista sira ne’ebé partisipa atu aproveita didi’ak formasaun ne’e no bainhira fila mai Timor-Leste, bele fahe koñesimentu no esperiénsia sira ne’ebé hetan ho kolega jornalista sira seluk ne’ebé seidauk iha oportunidade atu partisipa.
Programa ne’e nia objetivu mak hasa’e kapasidade no abilidade jornalista sira iha área jornalizmu modernu, atu responde ba mudansa iha paizajen mídia, transformasaun dijitál no nesesidade atu produz kobertura notisiosa ho padraun kualidade aas.
Partisipante sira kompostu hosi jornalista na’in neen husi Rádio Televizaun Timor-Leste, Empreza Públika (RTTL, E.P.), jornalista na’in hitu husi Ajénsia Notisioza Tatoli, E.P., no jornalista sira seluk hosi Timor Post, Jornal Independente, DÍLI Post, TVET, SAP News, Lafaek News, SMNew no STL. (aza)
