DILI Post news – Federasaun Futebol Timor-Leste (FFTL) liu-husi Adjuntu Sekretáriu Jerál FFTL, Fernando Baptista Xavier partisipa abertura ba Copa Juvenil Sub-15 iha Estádiu Glenu, loron 04 Dezembru 2025.
Copa Juvenil sub-15 ne’e organiza direta husi Assosiasaun Futebol Ermera (AFE) no partisipa husi klube mane hamutuk 8. Alende ne’e sei iha mós jogu ba klube Feto sira.
Iha abertura ne’e, Adjuntu Sekretáriu Jerál FFTL, Fernando Baptista Xavier lori Federasaun Futebol Timor-Leste(FFTL) nia naran hakarak hato’o ba jogadór sira katak, FFTL ho nia lema ida atu transforma futebol sai orgulho nacional, tanba ne’e atu konkretiza lema ne’e mak atividade futebol labele konsentra de’it iha Dili, maibé tenki desentraliza mós iha municipio hanesan dadaun copa juvenil la’o hela iha Assosiasaun Futebol Municipio sira.
Copa ida ne’e ho objetivu atu fó biban ba jogadór foinsa’e sira ba joga iha nacional no bele mós selesionadu ba reprezenta selesaun nacional Timor-Leste nian, ho ida ne’e mak bele reprezenta lema FFTL nian ne’ebe temi transforma futebol sai orgulho nacional.
Adjuntu Sekretáriu Jerál FFTL ko’alia ida ne’e tanba, lembra fali iha tempu sira uluk komp etisaun ba futebol barak liu konsentra de’it iha Dili, la to’o ba iha Muncipio, nune’e susar ba jogadór foinsa’e sira iha município ba joga iha nacional.
Maibé iha FFTL ida agora ho mandatu prezidente FFTL, Nilton T. Gusmão nian hahú lori futebol besik liu ba iha baze ka municipio ne’ebe konsege realiza ona Copa Juvenil 2025 ba Mane no Feto kategoria sub-17 no sub-15.
Tanba realidade hatudu ona katak, rezultadu Copa Juvenil sub-17 ne’ebe hala’o kada Assosiasaun Municipio konsege lori jogador foinsa’e sira ba reprezenta selesaun nacional Timor-Leste hodi partisipa jogu Kualifikasaun AFC U17 ASIAN CUP 2026 iha China.
Tanba ne’e, ikus liu hakarak lori FFTL nia naran agradese no parabens ba Assosiasaun Futebol Município sira ne’ebe konsege organiza ona Copa Juvenil Sub-17 no Sub-15 iha baze.
Alende ne’e, Prezidente Assosiasaun Juvenil, Sr. Agostinho Mesquita Martins husu ba Assosiasaun Futebol Ermera no parte hotu atu organiza didi’ak oan sira juvenil nune’e ba futuru bele sai jogadór ne’ebe kualidade.
Nune’e husu mós ba jogadór juvenil sira atu aproveita didi’ak oportunidade hodi treinu, tanba atu sai jogadór tenki treinu hodi bele prepara aan ba futuru bele sai reprezenta selesaun nacional Timor-Leste nian.
Abertura ne’e, prezensa husi reprezentante Prezidente Autoriedade Municipio Ermera, Komandante PNTL Municipio Ermera, Komandante F-FDTL Municipio Ermera, reprezentante veteranu Municipio Ermera, Prezidente Assosiasaun Juvenil, no Lideransa Assosiasaun Futebol Ermera.
Jornalista : Azacsi Quintão
