Dílipost.com, Loron 19 Abril 2026 — Boxista Timor-Leste, Maulay-Lym, ne’ebé reprezenta husi Klubu Tomás Americo Boxing, hatudu prestasaun di’ak iha eventu internasionál Trigger Promotion 7 iha Vietnam, liu husi vitoria kontra boxista Vietnam, Tum Lam.
Iha kompetisaun ne’e, Maulay-Lym konsege halakon adversáriu iha ronde dahaat, iha jogu klase profesionál ho peju 66,7 kilograma no durasaun ronde ha’at Vitoria ida ne’e fó orgullu ba
Timor-Leste, liu-liu ba desportu boxing.
Depois jogu, Maulay-Lym hateten katak nia senti kontenti tebes ho rezultadu ne’e. Nia mos agradese ba família sira nia apoiu no orasaun, ne’ebé fo forsa ba nia atu hetan susesu iha ring.
“Ha’u senti kontenti tebes-tebes, obrigado barak ba família sira nia orasaun. Agradese tebes ba treinadór no Klubu Tomás Americo Boxing ne’ebé lori ha’u mai kompete iha eventu ida ne’e,” dehan Maulay-Lym ba jornalista Dílipost.com via WhatsApp.
Nia mos hateten katak preparasaun ne’ebé di’ak no disiplina durante treinu sai fator importante ba nia vitoria. Klubu Tomás Americo Boxing mos sai parte importante iha dezenvolvimentu nia karreira desportiva.
Eventu ida-ne’e konsidera hanesan oportunidade bo’ot ba Maulay atu prova nia nivel iha kompetisaun internasionál.
Maski enfrenta adversáriu ne’ebé mai husi nasaun dezenvolvidu, Maulay dehan katak nia la tauk no sei fó nia mellór atu atinji vitoria.
Nia mos dehan lori responsabilidade bo’ot atu reprezenta Timor-Leste ho dignidade no orgullo.
Partisipasaun Maulay iha eventu internasionál ida-ne’e hatudu katak boxista iha Timor-Leste kontinua dezenvolve no hetan oportunidade atu kompete iha nivel global.
Espera katak nia prestasaun bele inspira joven sira seluk atu envolve an iha mundu depespotu no lori nasaun nia naran ba oin.
Jornalista : Azacsi Quintão
