Dílipost.com, Loron 27 Maiu 2026 — Prezidenti Klubu Karketu FC, Luís Oliveira, hatete katak Karketu FC sempre respeita no rekoñese servisu Liga Futeból Timor-Leste (LFTL), maibé bainhira iha desizaun ne’ebé klubu la konkorda, importante atu ko’alia sai hodi hadi’a sistema futeból nasional.
Komentáriu ida-ne’e relasiona ho desizaun LFTL atu hahú implementa sistema faan tiketi ba jogu Primeira Divizaun, ne’ebé foin hahú depois kompetisaun lao ona durante semana ida.
Luís Oliveira konsidera katak desizaun ida-ne’e tarde ona no la iha komunikasaun klaru ho klubu sira molok implementa.
“Jogu Primeira Divizaun lao ona semana ida, derepente foti desizaun atu faan tiketi. Tuir loloos Liga tenki fó sai ba públiku no ko’alia uluk ho klubu sira,” hateten Luís Oliveira ba jornalista iha stadiu Munisipál Dili.
Nia hateten katak klubu sira la bele trata hanesan “manu-futu”, ne’ebé de’it simu desizaun depois implementa tiha ona. Tuir nia, Liga tenki involve klubu sira iha prosesu foti desizaun tanba klubu mak parte importante hosi kompetisaun.
“Klubu sira hanesan manu-futu, imi lori ba futu tiha depois imi tagi, ida ne’e la bele. Tenki ko’alia ho klubu sira kona-ba sistema ida-ne’e,” nia dehan.
Prezidenti Karketu mós manifesta nia preokupasaun katak implementasaun sistema tiket bele hamenus númeru adeptu sira ne’ebé mai asiste jogu, liuliu tanba públiku seidauk abitu ho kultura sosa tiket atu tama estádiu.
“Imi fiar hau, bainhira mantein faan tiketi, ema sei menus no adeptu balu sei la mai nonton,” nia hateten.
Karketu FC afirma katak atualmente nia pozisaun seidauk apoia polítika faan tiketi ne’ebé implementa hosi LFTL. Nia argumenta katak Liga hetan ona apoiu husi Governu, ne’ebé nia konsidera hanesan osan povu nian, no tan ne’e fó livre ba adeptus sira durante liga la’o.
“Liga nia sponsor ida de’it mak Governu, no Governu mak povu. Di’ak liu lalika faan tiketi agora. Bele prepara di’ak ba tinan oin,” nia dehan.
Aleinde ne’e, nia mós levanta dúvida kona-ba transparénsia sistema distribuisaun reseita tiket nian. Tuir informasaun ne’ebé simu hosi Liga, 60 % hosi osan tiket sei ba klubu sira no 40 % ba LFTL. Maibé, Luís dehan katak klubu sira seidauk simu esplikasaun klaru kona-ba mekanizmu sistema ne’e.
“To’o agora ami seidauk hatene sistema faan oinsá. Loron ida faan hira, ami la hatene. Se 60 % ba klubu, tenki iha transparénsia no klubu hotu-hotu tenki hatene,” nia afirma.
Nia konsidera katak sistema tiket la’ós de’it kona-ba desportu, maibé tama ona iha área negósiu no jestaun finanseira, tan ne’e presiza mekanizmu ne’ebé klaru no aberta ba parte hotu.
Jornalista : Azacsi Quintão
