Díli Post, 05 dezembru 2025 – Iha ámbitu konkursu nasionál “Konstrusaun Páz liuhusi Arte Públika”, ne’ebé hala’o nu’udar parte husi komemorasaun Timor-Leste tama ofisiál ba ASEAN no promove husi Prezidénsia Repúblika ho apoiu husi Sekretaria Estadu Arte no Kultura (SEAK), ohin fó sai ona munisípiu haat ne’ebé sai manán-na’in.
Konkursu ne’e envolve artista sira husi munisípiu hotu iha nasaun laran, inklui Ataúro (la inklui RAEOA), ne’ebé dezenvolve intervensaun artístika iha espasu públiku, hodi refleta valór páz, unidade, kooperasaun rejionál no identidade kulturál timoroan nian.
Obra sira ne’e avalia husi júri espesializadu ida, ne’ebé konsidera kualidade artístika, pertinénsia tema nian no impaktu komunitáriu husi projetu ida-idak.
Nu’udar rezultadu husi prosesu ne’e, selesiona ona manán-na’in sira tuirmai ne’e:
Fatin 1.º (Dahuluk) – Díli, Fatin 2.º (Daruak) – Liquiça, Fatin 3.º (Datoluk) – Manufahi, Fatin 4.º (Dahaat) – Lautém.
Obra sira ne’ebé hetan distinsaun ne’e reprezenta rezultadu aas husi esforsu koletivu entre artista, komunidade lokál no instituisaun sira, hodi hatudu oinsá arte públika bele serve nu’udar instrumentu ba sensibilizasaun sosiál no promosaun páz.
Programa ne’e mós hametin kompromisu Timor-Leste nian ba valór integrasaun no kooperasaun ne’ebé orienta ASEAN, hodi selebra kriatividade no kontribuisaun artista timoroan sira ba kultura diálogu no moris-hamutuk ho dame.
Jornalista : Azacsi Quintão
