Dílipost.com,Loron 26 Maiu 2026 — Liga Futeból Timorense deside reativa fila fali sistema faan tiket ba adeptus sira ne’ebé mai asiste kompetisaun futeból iha estádiu, ho objetivu atu garante sustentabilidade futeból nasional no ajuda haforsa finansas klube sira.
Vise-Prezidente Liga Futeból Timorense, Osório Florindo, hatete katak polítika ida-ne’e importante atu eduka públiku katak futeból la’ós de’it desportu, maibé mós indústria ida ne’ebé presiza investimentu no apoiu hosi adeptu sira.
“Faan tiket nee la’ós buat foun ida. Iha liga no nasaun sira iha mundu tomak pratika ona sistema ida-ne’e atu sustenta futeból. Ita presiza hatene katak futeból nee ko’alia kona-ba indústria no merkadu,” dehan Osório Florindo ba jornalista sira iha Estadiu Munisipál Dili.
Tuir nia, Timor-Leste uluk implementa ona sistema hanesan, maibé depois hapara. Agora Liga deside hahú fila fali tanba kondisaun iha estádiu komesa di’ak, inklui disponibilidade kadeira no mahon atu proteje adeptu sira hosi udan.
Liga defini ona kategorisaun presu tiket tuir fasilidade ne’ebé iha iha estádiu. Ba tribun timur ne’ebé iha kadeira no mahon, tiket kusta US$2 no válidu ba jogu rua iha loron ida. Karik iha de’it jogu ida, tiket sei kusta US$1.
Aleinde ne’e, Liga planeia mós atu implementa tiket ho presu US$0.50 ba área ne’ebé laiha kadeira no mahon, maibé sistema ida-ne’e sei aplika de’it karik fatin ne’e konsidera apropriadu ba adeptu sira.
Osório Florindo, osan ne’ebé hetan hosi faan tiket sei distribui fila fali ba klube sira no operasaun Liga nian. Mekanizmu distribuisaun mak 30 porsentu ba klube primeiru, 30 porsentu ba klube segundu, no 40 porsentu restante ba Liga atu kobre despeza operasionál hanesan pagamentu funsionáriu, limpeza no seguransa.
“Mekanismu ida-ne’e atu ajuda klube sira sustenta nesesidade básika hanesan bee, ekipamentu no preparasaun sira seluk,” nia esplika.
Liga mós admite katak desizaun ida-ne’e influensia hosi gastu adisionál ne’ebé mosu durante kompetisaun. Maski uluk planeia atu hala’o jogu sira iha foho, ikusmai Liga transfere kompetisaun ba Estadiu Dili liuhosi kooperasaun ho Federasaun Futebol, ne’ebé aumenta kustu manutensaun no seguransa.
Vise-Prezidente LFTL dehan katak maioria klube iha Timor-Leste seidauk iha kapasidade finanseira forte tanba maioria lao ho baze voluntáriu no dominadu hosi ema sira ne’ebé hadomi futeból.
“Kuaze 90 porsentu klube sira la’ós empreza boot. Sira lao ho espírito voluntáriu, tan ne’e presiza apoiu hosi adeptu sira,” nia dehan.
Iha oportunidade ne’e, Liga Futebol mós husu deskulpa ba klube Primeira Divizaun sira ne’ebé lakon oportunidade hetan benefísiu tiket durante jogu lima ikus tanba sistema seidauk organiza ho di’ak.
Liga husu mós ba órgaun komunikasaun sosiál sira atu ajuda habelar informasaun ida-ne’e ba públiku atu adeptu sira bele komprende no kontribui diretamente ba sustentabilidade futeból nasional iha Timor-Leste.
Jornalista Estajiaria: Natália dos Santos
