Dílipost.com,Xina 24 Julli 2026 – Profisionál mídia husi Timor-Leste no Xina hasoru malu iha diálogu konjuntu ida kona-ba inovasaun no dezenvolvimentu, ne’ebé organiza husi China International Communications Group (CICG) liuhosi Institutu Estudu Internasionál no Formasaun Avansadu no Sentru CICG ba Ázia-Pasífiku. Atividade ne’e halo atu promove aprendizajen mútua, hametin amizade entre povu rua no habelar kooperasaun iha área mídia, juventude no komunikasaun internasionál.
Iha abertura programa, Adjuntu Diretór Institutu Estudu Internasionál no Formasaun Avansadu CICG, Zhu Zhongshu, simu ho laran haksolok delegasaun jornalista no profisionál mídia Timor-Leste ne’ebé mai partisipa programa interkámbiu iha Xina.
Zhu dehan programa ida-ne’e la’ós deit atu fahe koñesimentu, maibé mós atu hametin amizade no koperasaun entre nasaun rua.
” Programa ida-ne’e fó oportunidade ba jornalista no profisionál mídia Timor-Leste atu aprende kona-ba dezenvolvimentu Xina, troka esperiénsia profissional no haree rasik moris no dezenvolvimentu komunidade lokál. Ami espera katak ida-ne’e sei sai ponte atu hametin amizade no kooperasaun entre Xina no Timor-Leste,” dehan Zhu Zhongshu.
Nia hatutan programa ne’e hala’o husi loron 16 to’o 24 fulan Jullu 2026 Durante programa ne’e, partisipante sira sei vizita fatin importante sira iha Beijing, partisipa iha semináriu no diskusaun, no aprende kona-ba dezenvolvimentu ekonomia, kultura no inovasaun teknolojia iha Xina.
Nia mos lembra katak amizade entre Xina no Timor-Leste iha ona istória naruk, no relasaun bilateral tama ona iha etapa foun depois de nasaun rua eleva sira nia relasaun ba Parseria Estratéjika Komprensiva iha Setembru 2023.
” Amizade tradisionál entre Xina no Timor-Leste sai metin liután ho tempu. Iha parseria estratéjika ida-ne’e, parte rua kontinua aprofunda kooperasaun no implementa konsensu importante sira atu lori benefísiu ba povu rua,” nia hatutan.
Nia enfatiza katak mídia iha responsabilidade boot atu promove komprensaun entre sivilizasaun sira, liuliu iha tempu ne’ebé indústria mídia mundiál muda lalais tanba dezenvolvimentu Intelijénsia Artifisial (IA), plataforma dijitál no vídeo badak.
” Ita hotu hasoru oportunidade no dezafiu ne’ebé hanesan. Tanba ne’e, ita presiza aprende husi malu, troka esperiénsia no hametin kolaborasaun atu bele responde ba mudansa sira iha indústria mídia globál,” dehan Zhu.
Nia mos hato’o katak desde tinan 2015, Institutu Estudu Internasionál no Formasaun Avansadu CICG organiza ona liu hosi 100 programa formasaun internasionál ba jornalista, diplomata no profisionál husi nasaun oioin.
Iha oportunidade ne’ebé hanesan, Diretór Negósiu Komunikasaun no Peskiza Estratéjiku Sentru CICG ba Ázia-Pasífiku, Zhang Xuesong, dehan diálogu ida-ne’e importante atu hametin amizade entre juventude Timor-Leste no Xina.
“Juventude sira maka esperansa ba futuru nasaun ida-idak no mós futuru ba relasaun entre Xina no Timor-Leste. Ha’u espera katak liuhosi diálogu ida-ne’e, ita hotu bele ko’alia ho laran nakloke, aprende malu no harii amizade ne’ebé sei dura ba tempu naruk,” dehan Zhang Xuesong.
Nia hatete relasaun bilateral entre Xina no Timor-Leste kontinua dezenvolve ho di’ak liuhosi lideransa nasaun rua, no juventude iha responsabilidade atu kontinua hametin amizade ne’ebé harii ona husi jerasaun uluk.
” Ita sei sai amizade entre nasaun rua, kontadór istória dezenvolvimentu no konstrutór ligasaun ne’ebé besik liu entre povu Timor-Leste no povu Xina,” nia dehan.
Diretór Zhang Xuesong mos reafirma katak Sentru CICG ba Ázia-Pasífiku sei kontinua harii plataforma ba diálogu no interkámbiu atu habelar kooperasaun iha área mídia, juventude no komunikasaun internasionál.
Programa interkámbiu no diálogu konjuntu ne’e sei hala’o durante loron balu iha Beijing ne’ebé partisipante sira sei partisipa iha semináriu, vizita ba instituisaun governamentál, sentru mídia, universidade no fatin istóriku sira.
Nia dehan tan komisaun organizadór sira espera katak atividade ida-ne’e sei sai pontu partida ba kooperasaun ne’ebé naruk entre juventude no profisionál mídia Timor-Leste no Xina, hodi hametin Parseria Estratéjika Komprensiva no promove komprensaun mútua entre povu rua.
Jornalista : Azacsi Quintão
