DiliPost.com– Kazu jogu online ne’ebe ‘deteta’ involve arguidu nain sanulu (10) dadaun ne’e tenta atu halai sai husi Timor Leste.
Ho aktu ne’e liu husi alegasaun Ministériu Públiku (MP) reprezenta Prokurador, Matias Soares, Domingo (03/05) ne’e husu Tribunal halo alterasaun medida koasaun ba Prizaun Preventiva no aplika medida Kausaun ba arguidu nain 10 ne’ebé tenta atu halai sai husi Justisa iha Timor-Leste.
Tanba, antes ne’e Tribunál aplika medida koasaun Aprezentasaun Periodika no medida Kausaun 10 mill ba arguidu sira, ba kazu jogu online.
Tribunál Judisial Primeira Instansia Dili (TJPID), realiza Primeiru Interogatóriu ba arguidu nain 10 ho nia inisial YA, KKS, ZD, AJ, BST, MI, JO, MR, PG no YMK ne’ebé tenta atu halai sai husi teritoria Timor-Leste.
Iha prosesu Primeiru Interogatóriu ne’e, Tribunál halo tiha identifikasaun no rona deklarasaun arguidu sira nia, Tribunál deside hodi kontinua ba alegasaun husi MP.
Nune’e, iha alegasaun MP husu Tribunal atu halo alterasaun ba medida koasaun Prizaun Preventiva no medida Kausaun ne’ebé antes ne’e iha ona tanba antes ne’e, arguidu sira komete jogu online.
Aliende ne’e parte Defeza ba arguidu nain-10 Advogadu privadu, Julio Cardozo, husu Tribunal aplika medida koasaun Aprezentasaun Periodika no aplika medida Kausaun ba nia kliente sira, tanba nia kliente sira halai sai husi Timor tanba ema maka obriga sira.
Hafoin alegasaun tiha Tribunál deside muda ba loron aban (ohin Segunda-feira) ho oras tuku 5:00 loraik hodi rona despaxu ikus.
Advogadu privadu, Julio Cardozo, ne’ebé fó asistensia ba nia kliente sira deklara katak Tribunal atu hatun despaxu anterior nian, tanba antes ne’e sira komete kazu jogu online nune’e Tribunal deside aplika medida koasaun Aprezentasaun Periodika no medida Kausaun $10 mill ba arguidu sira.
“Husu para juiz nafatin hatun halo tuir nafatin kazu ida uluk nia, tanba uluk ne’e sira komete kazu jogu online iha momentu ne’ebá sira hala’o medida Kausaun sira tau tiha $10 mill iha Tribunal depois sira aplika tan Aprezentasaun Periodika semana ida aprezenta dala-rua. Agora ne’e mós ami husu nafatin para Tribunál hatun nafatin medida Kausaun ne’e sira bele livre hela iha li’ur,” informa Advogadu privadu ne’e iha TJPID, Domingo ne’e.
Nia esplika, alende iha alegasaun MP nia husu Tribunal atu halo alterasaun medida koasaun ba Prizaun Preventiva, tanba arguidu sira halai sai husi Investigasaun Timor nia, tanba iha ema balun mak konsola arguidu sira.
“Ministériu Públiku hatene sira nia situasaun sira lakoi halai ida. Maibé iha ema mak konsola sira para halai sai husi Timor no sira la iha intensaun atu halai no durante sira hala’o ona medida koasaun iha fulan ualu nia laran sira iha Timor”, Advogadu hatutan.
No antes ne’e, arguidu sira mensiona iha leten MP promove ho krime esplorasaun jogu ilisitu, Asosiasaun Kriminoza Brankeamentu Kapitál ho nia prosesu NUC. 0323/25.PNSIC ho medida koasaun aplika ba arguidu sira mak obrigasaun Aprezentasaun Periodika no medida Kausaun ho valor USD$10.000,00 (dez mil dólares americanos).
Iha loron 30, fulan Abril tinan 2026, sa’e bus naran Elboy, matrikula A 30-457, husi Dili ba Suai ho motivu atu ultrapassa fronteira Suai husi dalan ba Malaka, Atambua, Indonesia. Kuandu to’o tiha iha área Faulata , aldeia Quesamau, Suku Kassa, Postu Administrativu Ainaru-Villa, PNTL Munisípiu Ainaro passa revista ba bus refere no hetan arguidu sira iha laran, nune’e halo detensaun ba arguidu sira por volta de 13h 1 horas.
Depois entrega arguidu sira ba ekipa DSIK no kontinua halo detensaun iha flagrante delitu ba arguidu nain-10 tanba atu halai husi prosesu justisa né’ebé sira enfrenta, tuir dispostu art. 217⁰, 218⁰ no art. 219⁰ husi Kódigu Prosesu Penal.
Nune’e iha indisius katak MP promove arguidu sira ne’e hanesan autor ba krime dezobediensia tanba la kumpri desizaun Tribunál Dili no atu halai husi justisa Timor-Leste né’ebé dadaun ne’e sira enfrenta.
Iha audensia Julgamentu dahuluk ne’e, Prezide husi Juiz turnu estajiariu, Angelito Mendes Ribeiro, MP reprezenta Prokurador, Matias Soares, arguidu sira hetan asistensia legal husi advogadu privadu, Julio Cardozo. (Júlia)
