DILIPost.Com -Primeiru Ministru (PM) Kay Rala Xanana Gusmao ezerse ninia diretu votu ba Lideransa Komunitariu iha Aldeia Lakoto, Suku Balibar, Postu Administrativu Cristo Rei, Munisipiu Dili.
Iha okaziaun ne’e, PM Xanana husu ba Lider Komunitaria Xefi Suku no Aldeia tenke hare’e situasaun ne’ebe povu hasoru no juven atu kria paz, lori dezenvolvimentu ba povu Timor-Leste (TL), liu husi Lider Komunitariu sira iha programa desentralizasaun.
Lia murak hirak ne’e, hato’o husi Xanana hafoin ezerse ninia diretu vota iha Aldeia Lakoto, foin lalais ne’e. “Ha’u nu’udar sidadaun ida, iha ha’u nia Suku rasik iha Aldeia Lakoto.
Suku Balibar hodi ezerse diretu hili Xefi Suku no Aldeia, Delegadu/a sira. Ha’u nia espetativa hein Xefi Suku, Aldeia no Delegadu/a atu hetan fi’ar husi povu. Favor hare’e povu nia situasaun.
Liu-liu konaba Seguransa, ema la bele baku malun, labarik sira la bele baku malun, la bele tama arbiru iha Arte Marsiais (AM). Tanba, Governu iha programa atu desentralizasaun ba iha kada Aldeia no Suku, bele iha posibilidade boot liu atu atende nesesidades povu nian iha Administrasaun Postu sira,”dehan Xanana.
Iha ambitu Eleisaun Lideransa Komunitariu tinan 2023, PM Xanana akompaña ho nia oan mane Kay Olo. Ezerse sira nia diretu vota ba Lideransa Komunitariu hodi hala’o sira nia kna’ar iha rai doben TL.
Tu’ir observasaun Dili Post, PM Xanana akompaña ho nia oan mane Kay Olo, bainhira to’o iha Sentru Votasaun (SV), la diretamemte ba sha SV. Tanba, SV ne’e, loke ba publiku iha tuku 08:00 dadersan Otl.
Kandidatu Xefi Aldeia no Delegadu/a sira atu rejistu, tanba ne’e, PM Xanana ho nia oan mane kontinua hein iha SV. Momentu hein, PM konversa ho komunidade sira iha SV to’o tuku 09:00.
Hafoin Ofisial loke SV ba leitores sira atu ezerse sira nia diretu inklui PM tama iha SV hodi vota.
Prezente Tais
Iha ambitu votasaun, inan feto ida fo prezente Tais ba PM Xanana ho nia oan mane nu’udar agradesimentu ba Xefi Governu durante ne’e, apoiu ona sira liu husi atividades Relijiaun iha Balibar, Aldeia Lakoto.
Han Koto
Hafoin Xanana ho nia oan mane ezerse sira nia direitu vota, votante no povu Balibar foto hamutuk iha resintu SV, fo han koto ba Jornalista sira no Polisia Nasional Timor-Leste (PNTL), hodi fo hanoin iha tempu Rezistensia, Gerileiru sira nia ai-han favoritu mak koto hodi kontinua funu ba Ukun Rasik An.
Xanana ho memberu Governu hamutuk 77 simu posse husi Prezidente Republika (PR), Jose Ramos Horta iha Palasiu Prezidensial Ai-Tarak Laran, 1 Julhu 2023 no ofisialmente Xanana ukun IX Governu.
Durante tinan 5 resin la ka’e ukun husi Partidu Kongresu Nasional Rekonstrusaun Timor-Leste (CNRT). Oras ne’e, la’o hamutuk ho Partidu Demokratiku (PD). Festa demokrasi iha Nasaun TL konsidera susesu boot ne’ebe liu ona iha fulan Marsu, realiza Eleisaun Presidensial (ElPre) no iha loron 31 Maiu 2023, realiza Eleisaun Parlamentar (ElPar), no agora daudaun Eleisaun Lideransa Komunitariu.(al)
