Dílipost.com, 18 Janeiro 2026 – Jogu abertura kompetisaun Taça da Liga ne’ebé hein tebes husi públiku, entre ekipa AD. SLB hasoru Emanuel FC, remata ho rezultadu hanesan ka skor kbiit na’in 0-0.
Maske ekipa rua hatudu fali dezempeñu ne’ebé maka’as, maibe to’o apitu ikus la iha golu ne’ebé mak akontese.
Jogu ne’ebé Atraktivu husi minutu dahuluk iha parte primeiru, ekipa rua hatudu kedas ritmu jogu ne’ebé lalais. AD. SLB no Emanuel FC halo tentativa barak hodi ameasa baliza ba malu, maibe linha defeza husi parte rua nian servisu maka’as hodi evita bola labele tama ba rede.
Iha parte daruak, intensidade jogu kontinua sa’e. Atuante sira husi klube rua ne’e kontinua halo presaun no kria oportunidade oioin, maibe sorte seidauk lori sira ba rezultadu ne’ebé pozitivu. To’o jogu remata, rezultadu mantein nafatin 0-0.
Antuziazmu husi Adeptos no Konvidadu sirabJogu abertura ne’e la’o ho animadu tebes tanba hetan partisipasaun másimu husi adeptos (fanátiku) sira ne’ebé nakonu iha estádiu laran hodi fó apoiu ba sira-nia klube doben.
Aleinde ne’e, jogu ne’e mós marka prezensa husi, Membru Governu sira, ne’ebé mai hodi fó motivasaun ba dezenvolvimentu desportu iha rai laran.
Maske la iha vensedór iha jogu primeiru ne’e, ekipa rua hatudu ona disiplina no kbiit ne’ebé di’ak tebes, hodi sai hanesan sinál katak kompetisaun Taça da Liga tinan ne’e sei sai kompetitivu tebes.
Iha sorin seluk Asistente Treinadór Emanuel FC. Bang Basten hateten ohin jogu ida ne’e hetan oportunidade maibé avansa mak falla iha finalizasaun ekipa Emanuel labele hetan golu, tanba ne’e ekipa sei hadai di’ak liu tan iha jogu daruak nian sei hasoru Aitana FC.
” ami nia jogador avansadu ladun kontribui maximu ba iha jogu ida ne’e, ami hatene ida ne’e, ida ne’e hanesan materia ida para ami hadia di’ak liu tan iha jogu daruak tuir mai, ami nia avansa sira kontribui makas liu ba ekipa,” dehan asiste treinador.
Iha fatin hanesan Treinadór A.D SLB Laulara Vicente hateten jogu ida ohin hanesan jogu dahuluk, jogu ida dahuluk nia kapasidade as los.
” Ha’u hanoin jogu iha parte dahuluk ne’e jogu normal, nomos ohin ami uza jogador Estranjeiru ida de’it nia konsege hetan oportunidade barak maibe ekipa Emanuel la’os ekipa fraku, tanba tinan kotuk nia iha daruak klarifikasaun,Iha jogu tuir mai ekipa sei hadia fali buat balun,” konklui nia.
Jornalista : Azacsi Quintão
