DiliPost.com – Jogu desportivu komunidade nasaun sira ko’alia lian portuguésb (CPLP) sei abertura ba jogu dahuluk entre ekipa selesaun nasionál U-16 Timor-Leste (TL) kontra ekipa selesaun nasionál U-16 Portugal, iha estadiu Munisipiu Dili, iha loron Sabado 19 Jullu ne’e.
Jogu entre nasaun rua ne’e sei sai atrativu, tamba jogu nasaun rua ne’e foin akontese ba dala uluk iha jogu CPLP, iha TL, tamba ne’e esatdiu munisipal dili sei sai sasin ba jogu rua ne’e.
Ofisiál selesaun TL, Denilson Guilerme Guterres, hatete, prontu atu kompete iha jogu kontra ekipa selesaun portugal ho teknika no tatika ne’ebé durante ne’e prepara ona, iha loron aban.
“Preparasaun ba aban, husi parte futeból nian fiar katak saida mak durante ne’e ami fahe ba jogador sira, orsida bele haklean liu tan husi kapitaun, kona-ba taktiku ida ne’ebé mak durante mak ami fahe,fiar katak aban sira sei prátika iha kampu” dehan ofisiál selesaun Timor-Leste, Denilson Guilerme, liu konferensia Imprensa iha sala Media Center CCD, Sesta feira (18/07/2025).
Nia informa,hanesan treinadór mai ho prinsipiu no mehi ne’ebé boot hodi bele manan ekipa adversariu Portugal.
“Prinsipiu hanesan treinadór iha mehi ne’ebé boot tenki manán,tanba ita hanesan uma nain, atu realiza mehi ida ne’e ita he’in aban minutu 90 mak bele determina,maibe hanesan treinadór fiar katak aban sei manan” dehan nia.
Treinadór ne’e iha esperansa katak nia jogador sira sei halo kontente bola mania sira, maske la hatudu valor boot liu.
Nune’e mos kapitaun ekipa selesaun timor-leste U-19, Inigo Martins Fatima Braz, hatete prontu ona hodi hasoru adversariu husi portugal ho tekniku ne’ebé iha.
“Ami prontu atu joga iha loron aban hasoru Portugál, ho ami nia preparasaun durante ne’e, ho tekniku no tatika ne’ebé treinador sira fahe durante ne’e,”nia akresenta.
Iha fatin hanesan treinadór selesaun nasionál U-16 portugal, Pedro Mota da Silva, hatete, preparasaun ba jogu hanesan bai-bain ho maneira ne’ebé hanesan iha jogu kualifikasaun sira.
“Ami nia preparasaun hanesan bai-bain ami halo iha kualkér kompetisaun,no ami hakbesik ba ida-ne’e ho maneira hanesan iha jogu kualifikasaun sira iha europa ka hanesan iha torneiu ruma iha mundu tomak,”tenik Pedro.
Treinadór ne’e adiante eventu sira hanesan ne’e hola parte iha istoria no kultura iha nasaun sira ko’alia lian portugués
“Ha’u hanoin ekipa Timor-Leste no ekipa portugal hotu-hotu iha ambisaun hakarak manan, maibe ita bele dehan katak bele mana, bele lakon no mos bele impata, maibe fila fali ba esforsu jagador sira nian iha kampu laran,” relata trenador ne’e.
Maibe, nia dehan importante mak hamutuk iha amizade no unidade mak buat ida ne’ebé sei akontese iha eventu jogu CPLP, ida ne’e espesial ba timor-leste ho Portugal.
“Ha’u hanoin buat ida importante iha evantu ida ne’e mak, amizade, unidade mak buat ida ne’ebé ita tenke halo iha eventu ida ne’e, espesialmente iha jogu aban entre timor-leate ho portugal,”nia subliña.
Nia aprofunda, se ekipa TL konsege halo ida ne’e, tenke hato’o parabens, tamba ida ne’e mak objetivu husi ekipa hotu-hotu ne’ebé partisipa iha eventu ne’e,
“Ha’u hanoin husi unidade mak ita hamutuk nafatin, tamba iha tempu ida ne’e nasaun barak mak funu bebeik,tanba ne’e unidade mak buat ida ne’ebé ita tenke hasai hosi eventu ida-ne’e,”nia akresenta
Nia hatutan eventu ida ne’e, eventu ba labarik sira, ho objetivu prinsipal mak labarik sera bele hetan esperensia foun husi eventu refere.
“Ha’u hanoin ida-ne’e maka objetivu prinsipál, ba sira atu aprende hodi sai di’ak liután, atu koñese malu no mos koñese kultura foun sira, tanba ita-nia jogadór sira, liu-liu jerasaun foun ne’ebé mai, barak la hatene timór nia istoria pasadu, tanba ne’e se mana atu manan ou lakon ne’e la importante, maibe importante liu mak sira bele konese malu hodi diverte hamutuk,”nia adianta.
Nune’e partisipa iha kompetisaun ne’e laos ho obejetivu atu manan, maibe atu dezenvolve jogador sira, atu ba futuru bele hetan jogadór di’ak liu iha portugal.
“Ami iha ne’e atu dezenvolve jogador, la’ós ho hanoin atu tenke manán, tanba laiha ema ida maka mai iha ne’e atu hasa’e troféu ka medalla sira” nia realsa.
Aleide ne’e, nia la hare ba adversariu, maibe sempre joga ho maneira ne’ebé hanesan, oinsa mak bele anima ema hotu iha eventu ida ne’e.
Jornalista : Azacsi Quintao
