Dílipost.com, Loron 16 Janeiru 2026– Primeiru-Ministru Kay Rala Xanana Gusmão, fó resposta maka’as relasiona ho kestaun Prezidente Rádiu Televizaun Timor-Leste, Empreza Públika (RTTL, E.P.), ne’ebé alegadamente asume kargu polítika iha Partidu CNRT no hein hela Sekretáriu Estadu Komunikasaun Sosiál ba desizaun koletiva Konsellu Ministru (KM).
Bainhira jornalista sira konfirmasaun kona-ba kestaun ne’e, Xefe Governu hateten katak nia foin rona informasaun ne’e no hein hela hodi rona esplikasaun hosi Sekretáriu Estadu Komunikasaun Sosiál (SEKOMS) ne’ebé tutela ba órgaun komunikasaun estadu nian.
Xanana agradese ba informasaun ne’ebé jornalista sira hato’o, maibé nia subliña katak desizaun ruma tenke bazeia ba kordenasaun ho SEKOMS nu’udar tutela diretu.
“Agradese tebes ita-boot informa ida-ne’e, maibé ema nia oan ida SEKOMS ne’e agora la iha. Bainhira nia fila, informa ba nia. Ha’u kuarta-feira ha’u hein iha Konsellu Ministru,” dehan PM Xanana Gusmão iha Palásiu Prezidensiál iha Ailok-Laran.
Respeitu ba Hierarkia no Knar Ministru sira
Primeiru-Ministru mós kestiona kona-ba funsaun Ministru no Sekretáriu Estadu sira-nian se buat hotu tenke nia de’it mak foti desizaun.
Tuir nia, asuntu ne’e tenke mai hosi okos (SEKOMS) hodi aprezenta iha reuniaun Konsellu Manistro nian.
“Buat ne’e iha SEKOMS nia okos, tanba ne’e mak ha’u dehan liu hosi SEKOMS, SEKOMS lori ba Konsellu Ministru ami hasa’i (foti desizaun). Karik ha’u mak bele halo hotu-hotu, Ministru sira untuk apa (ba saida)?” hakotu PM.
Jornalista : Any Silva
