Dílipost.com, Loron 01 julli 2026 – Sekretáriu Estadu Komunikasaun Sosiál (SEKOMS) limita asesu ba média nasionál balun hodi la bele halo kobertura ba vizita ofisiál Primeiru-Ministru no Ministru Finansas Repúblika Singapura, Lawrence Wong, durante nia vizita mai Timor-Leste iha loron 02 – 03 Jullu 2026.
Tuir lista ne’ebé prepara ba kobertura ofisiál, númeru jornalista ne’ebé hetan autorizasaun atu tama ba programa sira limitadu ba ema 19. Média ne’ebé partisipa mak RTTL.EP ho jornalista nain-3, Tatoli nain-3, GMN-TV nain-3, SMNews nain-2, TVE-Timor nain-2, NTV-RAFA nain-2, Independente nain-1, Timor Post nain-1 no Suara Timor Lorosa’e (STL) nain-1.
Iha ajenda vizita ofisiál ne’e, Primeiru-Ministru Singapura simu resepsaun ofisiál iha Palásiu Prezidensiál, Bairro Pite, tuir kedas ho enkontru bilateral no deklarasaun imprensa.
Maski nune’e, la’ós atividade hotu-hotu mak loke ba média. Iha resepsaun ofisiál no sesaun bilateral, asesu ba jornalista sira hetan restrasaun de’it mak bele asusu bá Konferénsia imprensa mak sai oportunidade ida ne’ebé média bele halo kobertura.
Ho limitasaun ne’e, média nasionál balun la hetan oportunidade atu halo kobertura direta ba programa importante sira iha vizita Primeiru-Ministru Singapura nian. Situasaun ida ne’e halo média balun labele fó ba públiku kona-ba atividade ofisiál hotu-hotu ne’ebé realiza durante vizita ne’e.
Vizita Lawrence Wong ba Timor-Leste konsidera importante atu fortalese relasaun diplomátika no kooperasaun bilateral entre Timor-Leste no Singapura, liuliu iha área ekonomia, investimentu no dezenvolvimentu.
Dílipost.com konfirma ona ho Asesor Sekretáriu Estadu Komunikasaun Sosiál (SEKOMS) kona-ba limitasaun ba média nasionál sira iha kobertura vizita ofisiál Primeiru-Ministru no Ministru Finansas Repúblika Singapura, Lawrence Wong.
Tuir Asesor SEKOMS, desizaun atu limita númeru média no jornalista sira ne’ebé bele halo kobertura mai husi SEKOMS rasik. Nia hatete katak SEKOMS delega de’it média sira ne’ebé naran tama ona iha lista ofisiál ne’ebé prepara atu halo kobertura ba atividade refere.
Jornalista : Dílipost.com
