BOBONARO (DILI Post) – Komunidade kbi’it laek suku Mau-ubu Postu Administrativu Bobonaro Francisca da Costa no Francisco da Costa ho Oan nain 6 tenke hamonu matawen tanba hetan uma ida ne’ebe oferese husi Prezidente Republika (PR) José Ramos Horta.
Uma ne’ebe oferese husi Gabinete PR ho medida 6×7 , kuartu rua,Sala rua ,Dapur ida Sentina no Kompleto ho fasilidade Uma laran hanesan Kama ,Armariu,Meza ,kamera inkliu Televizaun no Parabola.
Iha sermonia intrega uma ne’ebe konstriu PR Jose Ramos Horta hateten sira avalia katak familia ne’e kondisaun moris susar tebes, ho nune’e gabinte PR deside hodi apoiu uma mahon ba familia refere.
“Ama ho Apa no nia Oan Nain ne’en,hau entrega uma ne’e ba sira liu husi Sosiedade Sivil PR nian hodi apoiu ba familia ne’ebe moris terus no susar,”espresa Sentimento PR hafoin entrega Ofisial Uma ba Familia Kbi’it laek ne’e iha Suku Mau-ubu Tersa feira(25/7).
Alende Prezidensiál Repúblika oferese Uma mahon ba familia Kbi’it laek ne’e, Gabinete Prezidensiál mos apoiu sasan Kios hanesan nesesidade bazika hodi bele sustenta nafatin Ekonomia familiar .
Aman ba Nasaun ne’e mos husu familia refere atu jere ho didiak ba apoiu ne’ebe oferese ona nunee bele sustenta moris familia nian.
“Ita mos fo apoiu sasan kios nian no osan reserva balun ba sira nune’e sira bele sustenta ekonomia familiar,”tenik Xefi Estado ne’e .
PR mos husu ba familia atu kuidadu ho uma neebe oferese ona,nune’e hela dura to’o tinan naruk.
Francisca da Costa ne’ebe simu uma husi PR ho oan nain neen hamonu matan wen ba apoiu ne’e, nune’e Francisca lori familia hotu agradese ba apoiu husi xefi estadu nian.Tanba, husi apoiu ne’ebe oferta núdar grasa ne’ebe hetan iha nia moris.
“Hau agradese ba Prezidente nia ajuda. Tanba, hau hanesan ema kiak no maluk laiha, ho uma ne’ebe fo hau fo obrigadu wain ba Prezidente,” espresa familia ne’e.
Familia ne’e konta tuir durante tinan 10 nian laran,sira moris iha situasaun ne’ebe difisil tebes ,tanba nia laen kaben sofre difisiensia tilun,nune’e nia deside halo servisu hotu-hotu tantu feto no mane nian, hodi apoiu ekonomia uma laran.
Ho matan wen Fransisca haktuir tinan barak barak nia laran ,sira nain walu hela deit iha barak ida. Kuandu, tempu udan susar tebes ,nune’e tenke Lori deit kapa at no kalen aat sira hodi satan netik udan.
Francisca ho Francisca iha oan nain walu ne’ebe sei kiik,agora halo sira nia estudu iha nivel primaria no oan mane boot dadaun ne’e halao estudu iha nivel Pre-Sekundariu.
Francisca haktuir situasaun moris ne’ebe durante ne’e sira halo mak moris hanesan Agrikultura, hanesan kuda modo nune’e bele lori ba merkadu hodi faan para hetan osan sustenta familia.
Ikus mai ho grasa maromak nian ,Francisca no kaben hetan apoiu uma mahon husi estadu Timor Leste, lliu husi Gabinete PR.
Molok PR José Ramos Horta husik familia ne’e, familia Kbi’it laek ne’e oferta hela simbolu agradese no tara Tais ba PR nudar sentimento agradesimentu ba apoiu hotu.
Jornalista: Javelino Da Silva
