Dilipost.com Loron 05 Janeiru 2026 – Estrada ne’ebé ligadu ba Aldeia Samarogo, Suku Nahareca, Postu Administrativu Viqueque, durante ne’e sai kestaun preokupasaun bo’ot ba komunidade tanba kondisaun ne’ebé ladún di’ak.
Maske nune’e, preokupasaun ne’e hahú hetan naroman hafoin ekipa husi Ministériu Obra Públika (MOP) Munisípiu Viqueque tun direita ba terrenu hodi halo site visit.
Xefe Suku Nahareca José M. S Lopes rekoñese katak durante ne’e komunidade Samarogo hasoru dezafiu boot, liuliu bainhira atu trata asuntu administrativu sira.
”Estrada ida ne’e sai preokupasaun boot ba ha’u-nia komunidade sira husi Aldeia Samarogo. Wainhira sira presiza trata sira-nia dokumentus importante ruma mai iha suku, sira hasoru difikuldade boot,” dehan Xefe Suku Nahareka ba jornalista Dilipost.com husi Via WhatsApps, Segunda-feira.
Aleinde asesu ba servisu públiku, kondisaun estrada ne’e mós fó impaktu negativu ba setór ekonómiku. Komunidade sira ne’ebé moris nu’udar agrikultór sente todan atu lori sira-nia produtu lokál ba fa’an iha merkadu sira ne’ebé besik.
“Difikulta mós ba ha’u-nia komunidade sira wainhira lori sira-nia produtu lokál ba asesu merkadu iha Quelecai no Baucau,” nia haktuir.
Ho prezensa ekipa tékniku MOP nian iha fatin refere, autoridade lokál no komunidade sente kontente no iha esperansa katak projetu hadi’a estrada ne’e bele la’o iha tempu badak.
”Ohin Ekipa MOP Munisípiu Viqueque halo ona site visit. Ami nu’udar autoridade lokál iha esperansa katak sei implementa (konstrusaun) iha tempu badak,” Xefe Suku ne’e hatutan ho otimismo.
Apelu ba Kooperasau Atu garante prosesu dezenvolvimentu ne’e la’o ho susesu, Autoridade Suku ne’e mós husu ba komunidade tomak, liu-liu iha Aldeia Samarogo, atu kontribui no fó apoiu ba servisu sira ne’ebé sei mai.
“Hanesan autoridade lokál, ha’u husu mós ba komunidade sira hotu atu bele koopera hamutuk hodi bele hadi’a ita-nia suku,” nia remata.
Jornalista : Azacsi Quintão
