Dílipost.com, Loron 30 Dezembru 2025 — IX governo Konstitusionál liu husi Ministériu Administrasaun Estatal (MAE) husi autoridade kompetente sira sei hahú implementa kobransa ba estasionamentu iha territóriu nasionál tomak hafoin termina festa loron bo’ot (Natál no Tinan Foun).
Ministro Administrasaun Estatal (MAE) Timas Cabral hatete, Medida ne’e bazeia ba lei ne’ebé iha ona kona-ba retribuisaun ba utilizasaun espasu públiku.
“Tuir regulamentu kusto ba estasionamentu ne’ebé sei aplika mak, Kareta $1.00 (Dolar ida) Motorclista $0.50 (Sentavus limanulu),” dehan MAE Tomas Cabral ba jornalista sira iha INAP komoro, Segunda-feira(29/12/2025).
Maske durante loron bo’ot Governu fó toleránsia no livre, maibé hosi Janeiru ba leten, kobransa ne’e sei sai obrigatóriu hodi garante orden no aumenta reseita ba estadu.
Proibisaun ba Festa iha Estrada Públiku Iha parte seluk, Governu mós fó hanoin fali katak tuir lei, taka estrada públiku hodi halo festa privadu ne’e konsideradu hanesan krimi. Polísia Nasionál Timor-Leste (PNTL) iha kompeténsia tomak hodi foti asaun tanba ida ne’e impede movimentu no viola direitu sidadaun sira seluk nian.
“Lei regula hela ida ne’e. Estrada públiku ba ema hotu, labele taka arbiru de’it. Polísia nia servisu mak atu asegura,” dehan MAE.
Preokupasaun ba Konservasaun iha Kristu Rei
Governu mós lamenta tebes hahalok balun husi komunidade ne’ebé abuza espasu turístiku sira durante tempu fó livre ba estasionamentu.
Informasaun sira indika katak iha ária Kristu Rei, vizitante balun uza fali oportunidade ne’e hodi hemu tua no estraga fali ambiente ho lixu.
Situasaun ne’e sai kontraditóriu ho programa Oseanu Azul ne’ebé foin lalais lansa hodi proteje tasi no kosta. Invéz de kuida, vizitante balun fali mak “halo foer fali oseanu” ho kalsu lixu.
Jornalista : Azacsi Quintão
