Dilipost.com- Eskola Ensinu Báziku Fillial (EBF) foun ne’ebe lokaliza iha Kamlai, Postu Administrativu Maubessi, Munisipiu Ainaro, inagura direita husi Prezidente Repúblika (PR) José Ramos Horta.
Iha serimonia Inagurasaun, Kuarta feira (13/11) ne’e. Xefe Estadu agradese ba doadór sira husi Austrália no mos serbisu di’ak husi sra. Cristy Gusmão ne’ebé hari’i ‘Fundasaun Alola’ bele serbisu hamutuk ho ekipa ‘Spend it Well’ ho voluntariamente halo kriasaun ba fundus sira hodi apoiu ona infraestrutura ba eskola refere.
“Ha’u agradese ba ekipa ‘Spend it Well’ tanba sira halo eskola barak ona iha Timor-Leste. Balun halo eskola, balun halo klínika, balun ajuda hanesan rotáriu sira ajuda buat seluk, balun fó bolsa estudu, purtantu sosiadade Austrálina, ema individual mós ajuda maka’as,” haktuir PR Horta.
Ho opurtunidade ne’e xefi estadu mos agradese ba Governu Australia ne’ebé tinan barak ona ajuda Timor-Leste.
Ne’e duni, nia parte kontente tebes no sempre disponivel bainhira konvida mai, tanba edukasaun importante duni ba oan sira nia futuru.
“Ba tulun sira ne’e, klaru sira nia parseiru ofisiál bo’ot mak Governu Austrália, hanesan parseiru númeru dahuluk no bo’ot liu iha mundu depois segundu Uniaun Europeia ne’ebé apoiu ona Timor-Leste. Ha’u mai iha eskola EBF Kamlai ne’e, ha’u simu konvite, ha’u nunka hatete la’e, ka rejeita konvite ruma ba fatin ne’ebé ha’u ba,”subliña PR.
Aliende ne’e nia mos haktuir fulan hirak liu ba mai fatin ida Aileu do’ok tebe-tebes, Nia ba to’o iha ne’eba no dala ida ba Bobonaro la hatene iha ne’ebé, to’o agora deputadu, membru governu ruma seidauk ba úniku mak ba to’o iha ne’eba, ema iha ne’eba araska liu, lori ajuda oituan ba sira, halo uma ida ba família iha ne’eba.
Entertantu dadus ne’ebe online Dili Post asesu total fundus husi ekipa “Spend it well” ne’ebé apoiu ba konstrusaun eskola EBF Kamlai ho volor orsamentu $70,000,00 ital.
Eskola refere konstrui tanba kuantidade númeru estudante iha eskola Kamlai hamutuk 136 pessoas, Mane 78 no estudante feto 58 ne’ebé fahe ba klasse 1º ano, 2ºano no 3º ano. (nelson)
