Dílipost.com, Loron 1 Abril 2026 — Konsellu Ministrus aprova projetu Rezolusaun Governu nian ne’ebé aprezenta hosi Ministru Administrasaun Estatál, Tomás do Rosário Cabral, atu define valór másimu to’o dolar amerikanu rihun 600 ba despeza prosesu transladasaun restus mortais (isin-mate) preladu katóliku sira hosi Portugál mai Timor-Leste
Dílipost.com asesu iha Komunikado ofisiál governu, iha desizaun ida-ne’e ho objetivu atu garante kondisaun nesesária hodi lori fila mai Katedrál Díli restus mortais hosi lideres Igreja Katólika nian ne’ebé iha kontribuisaun bo’ot ba nasaun. Sira mak Dom Jaime Garcia Goulart, Dom José Joaquim Ribeiro, Dom Martinho da Costa Lopes no Dom Alberto Ricardo da Silva.
Governu konsidera katak inisiativa ida-ne’e importante atu rekoñese legadu espirituál, istóriku no nasionál hosi figuras sira ne’ebé hala’o knaar pastorál iha Timor-Leste.
Ho transladasaun ne’e, hein katak restus mortais sira sei deskansa iha Katedrál Díli, fatin ne’ebé bele fasilita povu atu fó omenajen ho dignidade no respeitu.
Rezolusaun Governu ne’e mos estabelese enkuadramentu finanseiru atu apoia despeza sira relasiona ho prosesu transladasaun, inklui serimónia fúnebre no atividade omenajen sira.
Aleinde ne’e, obra sira ne’ebé nesesáriu hanesan konstrusaun, rekonstrusaun, reparasaun ka konservasaun iha área relevante sei hala’o hosi Ministériu Obras Públikas no Ministériu Planeamentu no Investimentu Estratéjiku, ho posibilidade utilizasaun Fundu Infraestruturas atu suporta finansiamentu.
Inisiativa ida-ne’e reflete kompromisu Governu atu valoriza kontribuisaun Igreja Katólika nian iha dezenvolvimentu sosial no istóriku Timor-Leste, no mos hametin identidade nasionál liuhosi rekoñesimentu ba lideres espirituál sira.
Jornalista : Díli Post
