DiliPost.com – Suspeitu nain tolu (3) ne’ebe identifika asaltu no kesi loza nain Polisia Nasional Timor Leste (PNTL) halo ona kapturasaun ba autor hirak ne’e.
Kazu halo asaltu ba loza refere akontese maizu menus tuku 4 madrugada iha Munisipiu Likisa loron Kinta feira (28/03) foin lalais ne’e.
Aliende ne’e asaun husi suspeitu sira tenta mos halo krimi hodi kesi loza nain Xineza Wan Yon Chcao.
Nune’e sira livre foti sasan loza inklui mos ho osan hafoin tula ba kareta ne’ebe sira prepara sai husi areia refere. Liu deit menitu balun loza nain komunika direita ba PNTL Munisipiu Likisa.
Ho informasaun ne’ebe sira simu husi vitima iha tempu ne’eba PNTL tun kedas halo identifikasaun no kaptura suspeitu hirak ne’e ho prende mos kareta ne’ebe utiliza hodi fasilita sira nia asaun.
Iha intervista Portavos Komando Jeral PNTL,Superintendente Xefe Polisia Antonio Dalus informa,komando PNTL Munisipiu Likisa halo kapturasaun ba suspeitu nain 3 wainhira hetan informasaun husi loza nain, prende mos ho kareta rua suspeitu sira aluga hodi tula sasan ne’ebe mak sira naok.
“Sira naok sasan iha loza xineza ida nian, ne’ebe antes atu foti sasan sira kaer loza nain kesi tia hodi foti sasan sira iha loza laran. Depois loza nain halo keixa ba iha komando PNTL Likisa no PNTL halo kedas asaun kapturasaun ba suspeitu nain 4 maibe ida halai liu konsege kaptura suspeitu nain 3 deit no ida seluk parte PNTL sei duni tuir, “dehan Antonio iha komando Jeral PNTL Kaikoli Dili,Segunda feira ne’e.
Portavos hateten Suspeitu nain 3 ho inisial ET,ne’ebe maka komete ona kazu krimi tama sai prizaun hamutuk dala 5 no AM halo Kazu hamutuk ba Dala rua tama sai prizaun,nomos suspeitu MMH foin primeiraves involve iha kazu nee.
“Suspeitu sira foti osan hamutuk 7 Mil,ne’ebe osan rahun 2 mill osan tahan 5 Mil ne’ebe total hamutuk 7 mil,no sasan kroat ne’ebe maka sira lori ameasa ba loza nain, katan ida,sabit rua nomos tali ida hodi kesi loza nain. Ita prende mos kareta prado kor silver ho numeru sapa matrikula 23035 nomos kareta marka Marda kor mutin ho numeru sapa matrikula A 12470 TL,nebe mak suspeitu sira aluga iha rental no agora sasan evidensia sira nee asegura hela iha komando munisipio Liquisa,no agora prosesu lao hela hein lori ba intrega ministerio publiku hodi halo prosesu primeiru introgatorio,” haktuir Portavos PNTL ne’e.
Nia mos relata suspeitu sira hela hotu iha Dili,iha hotu postu Dom Aleixo,Suspeitu ho inisial ET hela iha Aldea Terasanta Suku Madohi,Suspeitu Inisial AM hela iha aldea Rozario Suku Madohi, Suspeitu ho inisial MMH hela fatin Tera Santa suku madohi.
Ne’e duni, nia afirma PNTL sei buka tuir suspeitu ida ne’ebe maka halai lakon,no husu ba iha parte hotu bele kopera hodi bele fo informasaun ba iha autoridade sira atu bele kaptura lalais suspeitu ne’ebe maka halai lakon.(Ercia)
