DiliPost.com– Portavós Komandu PNTL, Superintendente Polísia, João Belo dos Reis, relata kona ba rezultadu investigasaun iha lokál krime submete ona ba Ministériu Públiku (MP) kontinua halo prosesu tuir mai.
“Ekipa investigasaun retira husi parte ne’ebá fila-fali mai Dili, rezultadu investigasaun aprezenta ona ba Ministériu Públiku ho NUC-rua, ida kona-ba ema mate no ida seluk kona-ba perturbasaun orden públiku,” dehan Portavós PNTL ba jornalista hafoin partisipa serimonia aniversáriu UPM ba dala-22 iha Resintu UPM Largo Lesidere, Tersa feira (27/05).
Nia hatutan, rezultadu investigasaun ne’ebé submete ba MP ne’e ho NUC-0149-PNSIK kona-ba Perturba Ordem Públika no NUC-0150 PNSIK kona-ba kazu hamate joven ida ho naran Ronaldinho Mota Ximenes (23) iha Kailaku.
“Suspeitu hamutuk-12 ita identifika, husi na’in-12 ne’e iha investigasaun klean mak balun bele hanesan suspeitu, balun bele mós hanesan vitima no testamuña,” haktuir João.
Aliende ne’e nia mos relata kona ba akontesimentu ne’ebé akontese iha loron 20 fulan Maiu iha serimonia icar Bandeira ba selebrasaun Restaurasaun Independénsia bala-23 iha Postu Kailaku liu husi konfrontu rezulta sidadaun ida lakon vida, no uma balun hetan estragus inklui motor no karreta balun.
“Ida ne’e segredu justisa, ha’u labele fó sai iha ne’e, aban bainhira sei aprezenta ba Ministériu Públiku, depois hatutan ba Tribunál mak ita bele akompaña,” esplika Superintendente Polísia ne’e.
Entretantu situasaun daudaun ne’e iha Postu administrativu Kailaku, Munisípiu Bobonaru ne’e la’o ho kontroladu, tanba hetan orientasaun husi Komandu PNTL hodi destaka membru Unidade Espesiál Polísia (UEP) hodi asegura situasaun iha terenu.(ercia)
