Dílipost.com, Loron 25 Juñu 2026 – Vise-Primeiru-Ministru Francisco Kalbuady Lay ho nia kometiva to’o iha Rezidénsia Faról tuku 14:49 hodi presta omenajen ikus ba Saudozu Francisco Guterres “Lú Olo”, Antigu Prezidente Repúblika no Prezidente Partidu FRETILIN.
Bainhira ko’alia ba jornalista sira iha Rezidénsia Faról, Kalbuady Lay dehan katak nia rona notísia kona-ba falesimentu saudozu Lú Olo bainhira nia iha Portugál. Tanba notísia triste ne’e, nia deside fila kedas mai Timor-Leste hodi hato’o sentidu kondolénsia ba família no estrutura FRETILIN tomak.
“ Ha’u iha hela Portugál mak rona Maun Lú Olo iis kotu, no ha’u husu Maun Boot no fila kedas mai, nu’udar Governu ho estrutura tomak hato’o sentidu kondolénsia ba família tomak, bá Komité Sentrál FRETILIN,” dehan Kalbuady Lay.
Nia dehan katak Timor-Leste lakon figura importante ida ne’ebé durante nia moris fó ona kontribuisaun boot ba luta no dezenvolvimentu nasaun. Maski sente triste, nia lembra katak buat hotu iha Maromak nia liman.
“ Ita Timor lakon ema di’ak ida hanesan maun Lú Olo, durante ha’u koñese nia dezde tun hosi ai-laran mai, maibé prontu buat hotu-hotu Maromak mak deside. Nune’e ita reza nafatin haraik ba Na’in Maromak fó fatin ne’ebé di’ak ba Maun Lú Olo,” nia dehan.
Kalbuady Lay mos apela ba povu tomak atu hamutuk fó apoiu no forsa ba família ne’ebé husik hela, liuliu ba oan sira ne’ebé sei kontinua estudu.
“ Ita hamutuk apoia malu nafatin hodi fó ba família, liuliu ba labarik sira ne’ebé sei eskola hela. Nune’e bele kontinua sira-nia estudu hodi bele lao tuir saudozu Lú Olo,” dehan Vise-Primeiru-Ministru ne’e.
Iha oportunidade ne’ebá, Kalbuady Lay mos rekordasaun nia amizade no servisu hamutuk ho Lú Olo durante prosesu konstrusaun Estadu Timor-Leste.
Nia dehan sira servisu hamutuk desde tinan 1999 ho lider FRETILIN sira seluk, inklui Sekretáriu-Jerál Mari Alkatiri, to’o harii Assembleia Konstituinte no Francisco Guterres “Lú Olo” eleitu sai Prezidente Assembleia Konstituinte.
“Ha’u hamutuk ho Maun Lú dezde 1999, ho kamarada sira seluk, Mari Alkatiri, to’o harii Assembleia Konstituinte no Saudozu Francisco Guterres Lú Olo sai Prezidente Assembleia Konstituinte,” nia dehan.
Kalbuady Lay hakotu ho sentimentu triste no recorda karakter simples no hakmatek ne’ebé Lú Olo iha durante nia moris.
“Ha’u la haluha nia tanba nia ema ne’ebé gosta toka no ha’u mós toka. Nia ema ida ladún ko’alia barak, sente lakon ema ne’ebé besik liu,” hakotu nia.
Jornalista : Ercia Freitas
