DiliPost.com- Komisaun Anti-Korrupsaun (KAK) hala’o esforsu atu finaliza dezeñu edifisiu foun, husu apoiu husi Ministériu Planeamentu no Investimentu Estratéjiku, Ministériu das Obras Públika (MOP) no ADN atu akompaña prosesu revizaun dokumentu tekniku.
Komisáriu KAK Rui Pereira dos Santos hateten, dezeñu ne’e komesa tiha ona husi tinan hirak liu-ba, maibé tanba mudansa kompañia, dezeñu uluk la konsege finaliza. Agora KAK ko’alia ho ajénsia estadu no parseiru seluk atu reviza dezeniu no finaliza dokumentu Bill of Quantity (BoQ), antes de halo prosesu konstrusaun iha tinan oin.
“Dezeñu prioridade ba ami tanba ita sei tama ASEAN. País sira hanesan Indonézia, Singapura, Malázia no Tailândia hotu-hotu iha edifisiu institusionál kompletu. Entaun Timor-Leste la bele atrasadu,” dehan Rui bá Jornalista iha edifisiu Nobre Ministériu Negósiu estranjeiru Tersa-Feira (27/05).
Nia hatutan edifisiu ne’e sei iha andar haat ho sela detensaun lima iha fatin okos, fatin ba ekipamentu no parkiran. Rai ida iha Palapasu ne’e besik sede partidu UDT nian, no dezeñu foun entrega tiha ona ba komisain Nasionál Aprovisionamentu (CNA).
Nia dehan, Valór estimativu konstrusaun $19 milhaun iha dezeñu uluk, maibé la konsege finaliza tanba kompañia internasionál ida la responde. Agora dezeñu foun ho BoQ entrega ba CNA ba prosesamentu.
“Tinan lubuk ida bá tiha ona tanba KAK nia edifisiu ne’e iha andar haat iha okos ne’e kuaze iha sela detensaun lima, atu nune’e bainhira KAK halo operasaun bele sela ema lubuk ida”tenik Rui.
Komisáriu KAK subliña mós importánsia prevensaun korrupsaun, hodi reforsa estratéjia luta kontra korrupsaun liu-husi sistema judisiál.
“Ita presiza estabelese Tribunal Supremu Justisa atu assegura ema bele buka justisa to’o nia topu. Tinan ne’e ami ko’alia ona ho Ministériu Justisa, Prezidente Tribunal Rekursu no Adjuntu Prokurador Jerál ba preparasaun,” hatete nia.
Edifisiu foun KAK konsidera estratéjiku atu suporta misau KAK iha área investigasaun, prevensaun no edukasaun korrupsaun iha Timor-Leste. (Octa)
