DiliPost.com- Eis Prezidente Rejiaun Administrativu Espesial Oe-Cusse Ambeno (RAEOA) no atual Sekretariu Jeral partidu FRETILIN, Mari Bin Amude Akatiri, presta deklarasaun ba akumulasaun Projetu sira iha Zona Espesial Ekonomia Sosial no Merkadu (ZEEMS).
Marka prezensa iha Ministériu Públiku (MP) bazea ba notifikasaun ho NUK 0036/25.PGGCC ligadu ho kazu Korrupasaun balun ho tipu abuzu poder, fraude fiskal bainhira sei asume kargu hanesan Prezidente RAEOA no ZEEMS.
Eis Primeiru Ministru ne’e too iha edifisiu MP Gabinete Sentrál Korrupasaun no Kombate Krime Organizadu Kolmera iha Prokuradoria Jeral Repúblika, Kolmera, ho oras tuku 9:35 dader karreta privadu xapa matrikula A.21.208 TL,akompaña husi nia eskoltu Korpu Seguransa Pesoál (CSP) no Advogada Privada , Soraya Marques hodi la’o tama ba iha Gabinete Sentrál Kombate Korrupsaun no Krime Organizadu (GCCCO) hodi submete ba prosesu ba iha MP
Hafoin presta tiha deklarasaun iha MP Mari Alkatiri hateten, nia parte kumpri notifikasaun hodi ba presta deklarasaun iha MP tanba respeita instituisaun Judisiál.
“Ha’u respeita Instituisaun Judisiariu, laos hanesan seluk kuandu bolu la mai, ha’u respeita Instituisaun Judisiariu maka hau mai ne’e,hau hakarak hametin Judisiáriu sai independente ne’e mak hau mai ne’e”, dehan Mari Alkatiri ba jornalista, iha Prokuradoria Jerál Repúblika Kolmera Segunda-Feira ne’e(25/05/2026).
Nia hatutan kona-ba nia estatu suspeitu ka arguidu ne’e nia la hatene tanba segredu justisa labele fó sai.
“Husu ba sira iha laran ne’e, la’ós balu hakarak uza, saida maka presta iha laran ne’e Segredu Justisa”, tenik nia.
Mari prontu atu hetan iha Tribunál ba kazu ne’ebé nia dadaun hetan iha MP.
“Hau sai imi prontu akompaña deit, luta ne’e foin hahú too aban bain rua.Hau nunka halai husi Tribunal, no MP hanesan ema balu”, nia afirma.
Entretantu Mari Alkatiri remata nia dilijensia iha MP Gabinete Sentrál Korrupasaun no Kombate Krime Organizadu Kolmera husi tuku 9:36 too 11:00.(Júlia)
