Dílipost.com, Loron 7 Marsu 2026 — Kompania importador kareta no motorizada sira iha Timor-Leste, klarifikasaun ba públiku kona-ba prosesu importasaun kareta no motorizada husi Indonesia mai Timor-Leste, liuliu depois akontesimentu kareta balun ne’ebé prende iha Kupang, provínsia Nusa Tenggara Timur.
Iha konferénsia imprensa ne’e, Porta-voz Manuela Natalia da costa hatete, kompania importador sira halo atividade importasaun kareta no motorizada iha Timor-Leste hala’o tuir prosedimentu legal ne’ebé estadu estabelese.
Kompania sira hotu ne’ebé hala’o negósiu refere tenke hetan autorizasaun husi Servisu de Registo e Verifisaun Empresarial (SERVE.IP) hanesan instituisaun estadu ne’ebé fó lisensa ba atividade empresariál.
” tuir kompania sira, molok halo importasaun, sira tenke hato’o pedidu importasaun liu husi sistema Portal ASYCUDA Timor-Leste ba Ministério do Comérsiu Indústria, liu-liu ba Diresaun Nasional Komérsiu Externu, atu halo verifikasaun no aprovasaun kona-ba tipu kareta ka motorizada ne’ebé sei tama mai Timor-Leste,” hateten Porta-voz Manuela da costa ba Jornalista sira iha Kampu-baru.
Porta-voz hatutun depois hetan aprovasaun husi ministériu refere, kompania kontinua halo rejistu iha Ministério dos Transportes e komunikasaun liu husi Diresaun Nacional dos Transportes Terrestres atu rejista kareta sira iha sistema ofisiál molok simu autorizasaun importasaun.
Nai haktuir Prosesu tuir mai mak halo klarénsia aduaneira liu husi Portal ASYCUDA no hetan verifikasaun husi Autoridade Aduaneira de Timor-Leste. Wainhira sasan sira to’o iha Porto de Tibar, instituisaun hanesan Inspetor Komérsiu, Transporte Terrestre no Aduaneira halo inspeksaun direta ba kareta no motorizada sira.
Tanba ne’e depois hetan aprovasaun hotu, kompania sira selu taxa ba Estadu liu husi banku no kontinua prosesu rejistu iha Diresaun Nasional Transporte Terrestre atu hetan sapa matríkula no dokumentu ofisiál sira seluk. Dokumentu sira ne’e mak tenke aprezenta iha Porto de Tibar molok kareta hasai ba armázem ka fatin faan.
Wainhira kliente sira sosa kareta ka motor, kompania sira fó kedas dokumentu ofisiál hanesan deklarasaun dealer, resibu simu osan no faktura original husi Diresaun Nasional Transporte Terrestre atu fasilita troka naran no hetan dokumentu hanesan Kartão Registu Veíkulu Motorizadu no Kartão Inspeksaun.
Baseia ba esplikasaun refere, kompania importador sira afirma sasan sira tama mai Timor-Leste liu husi prosesu ne’ebé kompletu no hetan autorizasaun husi estadu liu husi Ministério do komérsio e Indústria, Ministério dos Transportes komunikasaun no Autoridade Aduaneira de Timor-Leste, no taxa sira mós selu ona ba Estadu.
Entretantu, tuir informasaun ne’ebé sai iha média, inklui Rádio e Televizaun de Timor-Leste (RTTL), iha loron 5 Marsu 2026 porta-vós husi Polícia sientífika de Investigasaun kriminal (PCIC) hateten katak sidadaun Timor-oan balun ne’ebé halo viajen ba Kupang hetan apreensaun husi polísia POLDA Nusa Tenggara Timur (NTT), ho alegasaun katak iha suspeita burla agravada relasiona ho venda kareta.
Relasiona ho akontesimentu ne’e, kompania importador sira husu ba PCIC atu halo koordenasaun ho instituisaun autorizador sira hanesan Ministériu Komérsiu no Indústria, Direção Nasional Transporte Terrestre no Autoridade Aduaneira atu verifika informasaun ho lolos molok fó ba públiku.
Kompania sira konsidera katak kazu refere la afeta deit ba kliente sira ne’ebé sosa kareta, maibé mós bele fo impaktu ba reputasaun kompania importador sira ne’ebé hala’o atividade tuir lei ne’ebé vigor iha Timor-Leste.
Tanba ne’e, kompania importador sira husu mós ba autoridade Timor-Leste atu proteje sidadaun sira ne’ebé halo viajen ho kareta ba territóriu Indonézia, atu labele sai vítima iha futuru. Sira mós husu atu hametin koordenasaun ho autoridade Indonézia nian kona-ba prosesu exportasaun kareta nune’e labele fo impaktu ba negósiu importasaun kareta iha Timor-Leste.
” kompania sira husu ba Diresaun Nasional Transporte Terrestre atu halo verifikasaun ho rigor molok hasai autorizasaun ka guia de marsa ba kareta sira ne’ebé sei halo viajen ba territóriu Indonézia, atu prevene akontesimentu hanesan iha tempu tuir mai,” konklui Porta-voz.
Jornalista : Azacsi Quintão
