DiliPost.com-Governu Australia liu husi Departament of Industry, Science Energy and Resources (DISER), apoiu fundu ho montante $ 1.50 Mill ba Autoridade Nasional dos Mineiros (ANM), hodi funsiona ekipa Sekretariadu ba seitor Mineiru nian. Akordu ne’ebe refere ho ninia objetivu atu estabelese servisu hamutuk entre parte-2 liu-liu foka ba assuntu hirak ne’ebe ligadu ho seitor Mineiru nian.
“Ita agradese ba Governu Australia liu husi DISER ho laran lu’ak tebes hakarak oferese ona fundu balun ba ita atu bele organiza ekipa Sekretariadu bele funsiona servisu di’ak liu tan programa ne’ebe parte-2 aseita ona bele implementa ho di’ak,”konfesa Prezidente-ANM, Rafael Danilson Magno de Araujo ba Jornalista iha Salaun ANM, City 8 Maleuana, Kinta-feira (10/04).
Orgullu servisu hamutuk ho Timor-Leste (TL), liu-liu iha organizasaun importante sira se’i kontinua servisu iha tempu naruk atu hari’i kapasidade iha seitor importante sira iha TL.
Akordu
Rafael informa, ohin asina akordu entre Governu Australia no TL, liu husi Instituisaun-2 ne’e.
Governu Australia liu husi DISER-ANM parte Governu TL liu husi Ministeriu Petroleu Rekursus Minerais (MPRM), asina akordu-1 konaba kooperasaun no kolaborasaun iha seitor Mineiru ninian.
Jere
Rafael haktu’ir, husi akordu ne’e, estabelese mos ekipa Sekretariadu ne’e, kompostu husi Governu Australia no ekipa TL nian, ekipa tekniku hirak ne’e, se’i sa’i ekipa ne’ebe se’i Jere hotu kualker programa ne’ebe parte-2 aseita ona. Fundu iha tinan-1 ne’e, Governu Australia Aprova $ 1.50 Mill atu Jere de’it servisu Sekretariadu ninian.
“Ita se’i hare’e ba oin, atu la’o oinsa, karik Governu TL presiza ta’u fundu maibe, ba tinan-1 ne’e, husi DISER fo suporta barak. Karik ba oin se’i iha tan programa ruma parte-2 se’i diskuti tan oinsa atu bele prienxe tan fundu-1 ne’e,”nia tenik.
Kolaborasaun
Nia dehan ida ne’e, akordu kolaborasaun ne’ebe ninia durasaun nakloke ba kualker tempu. Kuandu parte-2 se’i iha boa fe hakarak atu servisu hamutuk,”ita se’i mantein nafatin akordu ne’e,”konklui Rafael.
Komesa
Fatin hanesan, Deputy Head of Mission, Edward Wilkinson informa, Governu Australia liu husi DISER-ANM hodi komesa lansa kolaborasaun entre TL ho Australia iha seitor minerais nian.
Assuntu importante ba TL no Governu Australia orgullu hetan oportunidade balun atu fahe esperiensia no sira ninia esperiesia iha Australia no rai seluk.
“Ami orgullu atu servisu hamutuk ho TL liu-liu iha organizasaun importante sira se’i kontinua servisu iha tempu naruk atu hari’i kapasidade iha seitor importante sira iha TL,”hakotu Edward Wilkinson.(any)
