DILIPost.Com, SEA Games 2025 — Atleta Boxing Timor-Leste, Alexandre Meliano Da Costa Freitas, hetan medalla bronze iha klase Welterweight Mane, hafoin manan kontra atleta Laos, Chalounseng Somphan, iha jogu kuartu finál iha Jogu Sudeste Aziátiku ba dala 33.
Vitoria ida-ne’e sai hanesan rezultadu bo’ot ba ekipa boxing nasional Timor-Leste, ne’ebé hatudu esforsu, disiplina no determinasaun atleta iha kompetisaun rejionál ne’ebé aas. Alexandre hamosu kbiit teknika no preparasaun di’ak durante jogu, hodi garante fatin iha podium.
Medalla bronze ida-ne’e aumenta tan koleksaun prestasaun Timor-Leste iha SEA Games 2025 no sai motivasaun ba atleta sira seluk atu kontinua hadia kualidade no prestasaun iha arena internasionál.
Iha sorin seluk Atleta boxing husi Wahidi Mohamad Rizal husi Malázia manán atleta Timor-Leste, Jacob Goncalves Alexandro, iha jogu kuartu-finál klase Bantamweight Mane (54kg) iha Jogu Sudeste Aziátiku ba dala 33.
Maski la konsege tama ba ronda oin, prestasaun Jacob Goncalves Alexandro hatudu esforsu bo’ot no korajen atu defende naran Timor-Leste iha kompetisaun rejionál ida-ne’e. Partida ne’e hala’o ho nivel aas no opoziun maka’as husi atleta Malázia.
Rezultadu ida-ne’e sai esperiénsia importante ba atleta no ekipa boxing nasional Timor-Leste atu kontinua hadia preparasaun no dezempeñu ba kompetisaun internasionál sira iha futuru.
Jornalista : Azacsi Quintão
