DiliPost.com- Projeitu konstrusaun edifísiu foun Institutu Nasionál Linguístika – Universidade Nasionál Timor Lorosa’e (INL-UNTL) ne’ebé atrazu dezde tinan 2024. Primeiru Ministru (PM) Kay Rala Xanana Gusmão husu ba empreza ne’ebe kaer obra kontinua servisu.
PM Xanana hato’o orientasaun ne’e bainhira akompaña husi Diretór Ezekutivu Agénsia Dezenvolvimentu Nasionál (ADN), Januário Maia Guterres, halo observasaun direta bá fatin konstrusaun iha Avenida Cidade de Lisboa Dili, Tersa feira (21/07).
“Husu bá UNTL atu prolonga kontratu hodi kontinua projetu ne’e no labele husik paradu. Husu bá ADN atu akompaña prosesu kontinuidade projetu ne’e,” tenik PM.
Xefi Governu haktuir projetu ne’e hetan atrazu tanba empreza enfrenta problema interna, maibe hare realidade iha terrenu Kompañia esforsu nafatin atu finaliza servisu no kompañia servisu ho Kualidade ne’ebe diak.
Iha fatin hanesan Diretór Ezekutivu ADN, Januário Maia Guterres hateten vizita ne’e bazeia bá rezultadu verifikasaun ADN iha terrenu.
Tan ne’e, nia dehan PM deside tun direta hodi haree situasaun no fó orientasaun bá empreza atu kontinua obra.
“Vizita mai iha UNTL bazeia bá atualizasaun ADN kona-bá prosesu verifikasaun projetu ne’ebé la’o tarde. Nune’e, Primeiru-Ministru tun direta hodi observa no husu empreza atu kontinua projetu ne’e,” sublibña Diretór ADN.
Entertantu projetu konstrusaun edifísiu foun INL-UNTL ho númeru kontratu RDTL 08/CUNTL/CONCURSO/XII/2023, ho montante kontratu hamutuk $768,574.94.
Projetu ne’e hahú iha 5 Janeiru 2024 no tuir planu remata iha 8 Outubru 2024. Empreza kontratora mak Konsórsiu DWIPONGGO, Be’e Feto Kaduak no TATA JV. (Aza)
