Dilipost.com, Loron 17 Fevereiru 2026 – Problema kualidade servisu hosi Eletrisidade de Timor-Leste (EDTL, E.P.) kontinua sai kestaun ne’ebé hamosu preokupasaun bo’ot iha komunidade nia leet. oriseik loraik, sistema sosa pulsa elétrika (token) nian hasoru falla tékniku ka error, ne’ebé rezulta kliente barak iha kapitál Dili no munisípiu sira labele sosa pulsa Eletrisidade ba sira-nia uma laran.
Sidadaun ida ne’ebé lakohi fó sai nia naran fontes anónimu, hateten nia hirus no konfuzaun relasiona ho Sistema Error ne’ebé akontese bei-beik ne’e.
Situasaun ne’e obriga kliente sira atu forma naruk iha postu sosa pulsa sira, inklui balun ne’ebé tenke hein to’ok kalan bo’ot ho esperansa katak sistema bele fila ba normál hodi sira bele sosa enerjia ba nesesidade loron-loron nian.
“Ita ne’ebé iha sidade bele buka dalan seluk, maibé oinsá ho sira iha munisípiu? Ne’e pior liu tanba sira atu ba hola iha ne’ebé se fatin sosa pulsa dook no sistema falla error? Baibain sistema ne’e error beibeik hela hanesan ne’e ona, problema nia fukun ne’e iha loos saida?” dehan fonte ne’e ba jornalista DP iha Elemloi.
Lamentasaun ne’e la’ós de’it mai husi sidade Dili, maibé kestaun ne’e todan liu ba komunidade sira ne’ebé hela iha área remota ka munisípiu sira, ne’ebé asesu ba fatin sosa pulsa limitadu tebes.
To’o notísia ne’e sai, públiku seidauk simu klarifikasaun ofisiál ne’ebé detallu husi parte EDTL, E.P. kona-ba kauza husi falla sistema ne’e. Kliente sira kestiona katak, iha era dijitál ne’e, tanba sá mak kestaun “error” ne’e kontinua sai hanesan “moras kroniku” ne’ebé seida’uk iha solusaun permanente.
Komunidade hein katak governu no EDTL bele halo modernizasaun ba sira-nia infraestrutura teknolojia hodi la prejudika povu ne’ebé prontu ona atu selu.
Jornalísta : Azacsi Quintão
