DILIPost.Com- Prezidente Repúblika (PR) Jose Ramos Horta, iha esperansa bo’ot atu maioria feto mak eleitu sai Xefi Suku no tuir kampaña ne’ebé mak durante ne’e nia halo atu bele vota ba feto Lian hirak ne’e xefi estadu hato’o iha sentru votasaun eskola Primária Filial Metiaut, Aldeia 17 de Abril, Suku Metiaut, Sábadu ne’e.
“Se feto barak mak eleitu ha’u kontenti loos, ne’e hatudu timoroan sira-nia maturidade”,dehan PR Horta.
Xefi estadu ne’e dehan Xefe suku ne’ebé iha agora dadauk kuaze 90% mane no ida ne’e, la signifika katak mane la di’ak, maibé tuir Xefe Estadu presiza halo balansu jenéru no fó fiar mós ba feto atu bele lidera.
Prezidente mós hanoin hodi sujere ba Governu atu oinsá bele ajuda hadi’a netik Xefe Suku sira-nia uma, hadi’ak mós Sede Suku no halo Sentru Komunitáriu ida kada Aldeia.
Tuir Observasaun iha terenu PR Ramos-Horta haree katak komunidade sira-nia partisipasaun iha sentru votasaun barak liu fali kompara ho votasaun Parlamentar foin lalais.
PR rekomenda ba Governu liu-liu parte kompetente atu ba Futuru tau matan mós ba ferik, katuas, liu-liu ema ho kondisaun defisiente sira. Xefe Estadu mós apela ba Xefe Suku sira ne’ebé eleitu depois bele servisu badinas ho laran atu bele hadi’a sira-nia suku laran.(AnY)
