Dílipost.com, Loron 27 Janeiru 2025– Konsellu Ministrus (KM) foin lalais ne’e aprova projetu Rezolusaun Governu ida hodi ezonera atuál Prezidente Konsellu Administrasaun Rádiu no Televizaun Timor-Leste, Empreza Públika (RTTL, EP), Elizeu Isac Fernandes, no nomeia Rosário da Graça Maia hodi asume kargu ne’e ba mandatu tinan haat (2026-2030).
Proposta ne’e aprezenta hosi Ministru Prezidénsia Konsellu Ministrus, Agio Pereira, no Sekretáriu Estadu Komunikasaun Sosiál (SEKOMS), Expedito Dias Ximenes. Nomeasaun foun ne’e sei hahú púr efeitu iha loron 1 fulan-Fevereiru tinan 2026. Razaun Ezonerasaun Violasaun ba Estatutu RTTL.
Sekretáriu Estadu, Expedito Dias Ximenes, esplika katak desizaun hodi hasai Elizeu Isac Fernandes bazeia ba kestaun inkonpatibilidade. Tuir Dekretu-Lei Nu. 42/2008, liuliu iha Artigu 13, Alínea B, membru Konsellu Administrasaun RTTL, EP la bele asume kargu nu’udar dirijente ba partidu polítiku.
”Iha prosesu servisu, nia Elizeu la konsiente deforma formál hodi hola parte hanesan primeiru vise Sekretáriu Ezekutivu iha organizasaun partidu ida. Ne’e viola kriteria imparsialidade ne’ebé hakerek ona iha lei,” dehan SEKOMS ba jornalista sira iha Palásiu Governu,(27/01/2026).
Governu hili Rosário da Graça Maia bazeia ba ninia, Imparsialidade no Integridade Rekezitu fundamentál ba média estadu, Kapasidade Téknika Esperiénsia naruk iha mundu komunikasaun sosiál, Senioridade Koñesimentu luan iha área jestaun no komunikasaun.
Tuir SEKOMS, prosesu administrativu la’o hela hosi Prezidénsia Konsellu Ministrus (PCM) hodi prepara publikasaun iha Jornal Repúblika.
”Sei konvida Rosário da Graça Maia atu simu knaar ne’e hafoin rezolusaun ne’e publika iha Jornal Repúblika. Tomada-de-pose sei akontese tuir kalendáriu ne’ebé planeia ona,” SEKOMS konklui.
Atuál Prezidente Elizeu Isac Fernandes asume kargu ne’e kuaze tinan ida liubá, maibé tenke remata sedu ninia mandatu tanba kestaun legál ne’ebé temi ona.
Jornalista : Azacsi Quintão
