Dílipost.com, 11 Agustu 2026 – Prezidente Repúblika José Ramos-Horta, konsidera líder Revolusaun Kuba, Fidel Castro Ruz, nudar “Belun Bo’ot Timor-Leste nian”, liuliu tanba nia kontribuisaun no solidariedade Kuba ba Timor-Leste iha área saúde, edukasaun no formasaun rekursu umanu.
“Ba ami, Timoroan, Fidel Castro sai, liu-liu, Belun Bo’ot Timor-Leste nian,” hateten Ramos-Horta iha selebrasaun aniversáriu Fidel Castro iha AMRT.
Nia lembra katak iha tinan 2003, bainhira Timor-Leste foin restaura independénsia, nia hamutuk ho Prezidente Repúblika iha tempu ne’ebá, Kay Rala Xanana Gusmão, hasoru Fidel Castro iha Kuala Lumpur. Iha tempu ne’ebá, Timor-Leste enfrenta nesesidade boot, liuliu iha saúde no formasaun rekursu umanu.
Tuir Ramos-Horta, Fidel Castro kompriende situasaun Timor-Leste nian no Kuba responde ho asaun konkretu, liuhusi enviu médiku no profisionál sira ba Timor-Leste, no fó oportunidade ba joven timoroan sira atu estuda iha Kuba.
Kooperasaun entre nasaun rua ne’e, tuir Prezidente, kontribui ba formasaun médiku timoroan atus ba atus no hametin kapasidade saúde nasionál.
“Kuba la fó de’it asisténsia mai ami; sira ajuda ami atu forma ema,” dehan Ramos-Horta.
Nia mos destaka kooperasaun iha área edukasaun, liuliu liuhusi programa alfabetizasaun “Yo, sí puedo”, ne’ebé ajuda ema timoroan rihun ba rihun aprende lee no hakerek.
Prezidente Ramos-Horta konsidera katak solidariedade Kuba ba Timor-Leste la limita de’it ba asisténsia, maibé envolve dimensaun umana ida ne’ebé importante. Nia lembra katak profisionál kubanu sira servisu hamutuk ho komunidade Timor-Leste nian, inklui durante períodu sira ne’ebé difísil.
Nia afirma katak solidariedade loloos bele sukat liuhusi maneira ema ida ajuda ema seluk bainhira enfrenta tempu difísil.
“Solidariedade la sukat de’it hosi saida maka ita halo bainhira buat hotu la’o di’ak. Ida-ne’e sukat hosi saida maka ita halo bainhira ema seluk hasoru hela tempu susar sira. Ne’e mak Cuba halo ba Timor-Leste,” Afirma PR Ramos-Horta.
Dehan Ramos-Horta mos destaka legadu internasionál Fidel Castro iha Súl Globál, liuhusi kontribuisaun médiku, profesór no profisionál kubanu sira iha Áfrika, Amérika Latina no Ázia.
Nia reafirma katak Timor-Leste sei kontinua valoriza relasaun ho nasaun sira ne’ebé fó apoiu durante luta ba autodeterminasaun no prosesu konstrusaun Estadu.
Iha parte seluk, Ramos-Horta defende diálogu, kooperasaun, multilateralizmu no respeitu ba Direitu Internasionál hanesan dalan atu rezolve diferensa entre Estadu sira. Nia mos hato’o preokupasaun kona-ba situasaun ekonómika no enerjétika ne’ebé Kuba enfrenta, ne’ebé afeta populasaun no servisu fundamentál sira.
Prezidente Ramos-Horta hato’o mensajen katak legadu solidariedade Fidel Castro tenke inspira ema sira iha mundu tomak atu dedika sira-nia serbisu ba saúde, edukasaun, kooperasaun no defeza dignidade umana.
“Liuhusi sira mak amizade entre nasaun sira sai realidade,” nia konklui.
Jornalista : Dílipost.com
