DiliPost.com- Udan boot ho velume ne’ebé maka’as tebes no rai lakan, hodi rezulta Joel de Araújo ho idade 14 lakon Vida iha fatin akontesimentu, iha Suku Hoholau,Munisípiu Aileu.
Iha Intervista ho maun Custódio de Araújo Konta tuir katak, udan bo’ot ne’ebé ho velume maka’as hodi rai lakan tarutu hodi rezulta Joel de Araújo mate fatin.
“Udan bo’ot ne’e mosu iha tuku 1 meiudia, akontese rai-lakan tarutu iha tuku 2 liu, derepente ami rona husi maun Mariano da Silva katak Joel hetan dezastre. Entaun nia mai hateten ba ha’u, nune’e ha’u ba haree maibé nia laiha ona iis,”informa Custódio ba online Díli Post liu husi vía whatsapp iha Munisípiu Aileu, Tersa feira (14/01).
Hafoin dezastre ne’e akontese, iha doutór ida ba halo ‘chek up’ ba alin ne’e maibé infelizmente Joel da Silva laiha ona iis.
“Doutor ida mak mai haree maibé alin Joel laiha ona iis, nune’e ami lori ona nia ba iha nia residênsia,” haktuir nia.
Matebian Joel de Araújo halo ona tinan sanulu resin-haat (14) oan husi João Crecas ho Filomena Cuca,matebian dadaun ne’e eskola iha Aileu Villa tur iha banku primáriu ho klase 4 anu.
Entertantu dezastre ne’e akontese loron 14 Fulan Janeiro 2025 iha Aldeia Mauria, Suku Hoholau, postu administrativu Aileu Villa, Munisípiu Aileu. (Júlia)
